Prapaskenat e shkarkimit nga KRU “Gjakova”, Hasan Krasniqi: Më vunë para zgjedhjes së detyruar

Ish-kryeshefi ekzekutiv i Kompanisë Rajonale të Ujësjellësit “Gjakova”, Hasan Krasniqi, ka thyer heshtjen pas shkarkimit të tij nga kjo pozitë, duke zbuluar detaje nga mbledhja e tensionuar e Bordit që i parapriu këtij vendimi. Përmes një shkrimi të publikuar në rrjetet sociale, Krasniqi ka sqaruar se gjatë takimit është trajtuar çështja e ndërprerjes së marrëveshjes me operatorin ekonomik “Liqeni i Dukagjinit”. Ai thekson se kishte kërkuar një vendim zyrtar e të dokumentuar nga ana e aksionarëve ose e vetë Bordit për këtë hap. Sipas rrëfimit të tij, kryesuesi i Bordit i kishte kërkuar prerazi që të vepronte menjëherë për prishjen e kontratës, kërkesë të së cilës Krasniqi i ishte përgjigjur duke kërkuar një bazë formale me shkrim, për shkak të rreziqeve të mëdha ligjore dhe financiare që mund të prodhonte një veprim i tillë. “UNË: Kryesues, unë kam kërkuar dhe po kërkoj edhe tani një vendim nga Aksioneri ( Ministri e Ekonomisë) ose nga ju Bordi me vetëm dy rreshta të shkruar dhe po e ndërpres tani menjëherë kontratën,” ka shkruar ai, duke sjellë ndërmend dialogun e zhvilluar në mbledhje. Më tej, ai pohon se presioni i është bërë i qartë përmes një ultimatumit të drejtpërdrejtë nga kryesuesi, i cili i kishte vënë kusht që ose të firmoste aktin e ndërprerjes, ose të largohej nga detyra përmes dorëheqjes. “KRYESUESI I BORDIT: Ose nënshkruaje prishjen e kontratës ose jep dorëheqje,” ka cituar Krasniqi në postimin e tij, duke shtuar se u kishte tërhequr vëmendjen anëtarëve të tjerë për barrën ligjore të këtij vendimi. Në përmbyllje të rrëfimit të tij, Krasniqi ka bërë të ditur se pas refuzimit të tij, kryesuesi i Bordit i ka kumtuar vendimin për largimin nga pozita dhe i ka kërkuar të lëshojë ambientin e takimit. “KRYESUESI I BORDIT: Je i shkarkuar , liro sallën. Mirret vendimi për shkarkim , antarët tjerë të bordit nuk lëvizin dhe nuk e qelin gojën,” ka shkruar ai, duke konfirmuar se është larguar menjëherë nga salla.