Ahmeti pas protestës masive në Shkup: Mesazhi i qytetarëve ishte i qartë, drejtësi për çlirimtarët

Qindra qytetarë shqiptarë në Maqedoninë e Veriut u mblodhën sot në një protestë në Shkup, për të kundërshtuar vendimin e Gjykatës Speciale në Hagë ndaj katër ish-krerëve të Ushtrisë Çlirimtare të Kosovës. Lidhur me këtë ngjarje, kryetari i Bashkimit Demokratik për Integrim dhe njëherësh ndër themeluesit e UÇK-së, Ali Ahmeti, ka ndarë në rrjetet sociale pamje nga tubimi, duke e cilësuar atë si një thirrje unanime për drejtësi. "Sot në Shkup, njëjtë si në Prishtinë dhe në qytete të tjera, u mbajtën marshime paqësore e protestuese në mbështetje të çlirimtarëve dhe me një kërkesë të qartë: Liri për çlirimtarët! Liri për pjesëtarët e Ushtrisë Çlirimtare të Kosovës!", ka theksuar ai në mesazhin e tij. Sipas kreut të BDI-së, figurat kyçe që udhëhoqën luftën për liri nuk mund të jenë subjekt i vendimeve që bazohen në pretendime të montuara dhe në skenarë të sponsorizuar nga Beogradi e Moska. Në përmbyllje të reagimit të tij, Ahmeti kërkoi që proceset gjyqësore të bazohen ekskluzivisht në prova dhe standarde të paanshme, duke ritheksuar se vullneti i shfaqur nga protestuesit në Shkup dhe Prishtinë dëshmon mbështetjen e palëkundur për heronjtë e lirisë.