Skenë dhune në Superkupën e Argjentinës: Juan Sebastian Veron sulmon ashpër gjyqtarin pas përfundimit të finales

Finalja e Superkupës së Argjentinës mes Rosario Central dhe Estudiantes de La Plata është shoqëruar me incidente të rënda, duke lënë në hije triumfin në fushën e blertë. Edhe pse Rosario Central ngriti lart trofeun pas fitores 3:1, ku spikatën edhe paraqitjet e yllit Angel Di Maria, vëmendja e opinionit sportiv u rrëmbye nga pamjet skandaloze të dhunës në fund të takimit. Shkak i kësaj përleshjeje të madhe u bënë vendimet e gjyqtarit Dario Herrera, të cilat u kontestuan ashpër nga kampi i Estudiantes. Tensioni shpërtheu që në minutat shtesë, kur mbrojtësi i Estudiantes, Tomas Palacios – i huazuar nga Interi – u përfshi në një përplasje verbale dhe fizike me trajnerin kundërshtar, Jorge Almiron. Menjëherë pas vërshëllimës përfundimtare të arbitrit, fusha u kthye në arenë kaosi. Lojtarët, pjesëtarët e stafit teknik dhe drejtuesit nga të dyja skuadrat u përfshinë në një përleshje masive, e cila u transferua edhe në korridoret që të çojnë drejt dhomave të zhveshjes. Situata agravohet më tej kur në mes të turmës u përfshi presidenti i Estudiantes, Juan Sebastian Veron. Ai iu drejtua gjyqtarit kryesor me fjalë të rënda dhe akuza të drejtpërdrejta pas mbylljes së ndeshjes. “Kjo është e gjitha jotja, hajdut!”, u dëgjua të thoshte kreu i klubit. Si shenjë e fundit proteste dhe pakënaqësie ekstreme ndaj sistemit të gjykimit, lojtarët e skuadrës humbëse shoqëruan ceremoninë me duartrokitje sarkastike ndaj fituesve.