Magjia e Di Marias ngre në këmbë Rosarion: Trofe i ri historik në Argjentinë

Angel Di Maria ka dëshmuar edhe një herë se klasit dhe magjisë së tij nuk i ka ikur koha. Të shtunën në mbrëmje, skuadra e Rosario Central ka triumfuar në Superkupën e Argjentinës, duke mposhtur Estudiantes me rezultatin 3-1, në një ndeshje ku protagonist absolut u bë kapiteni i saj me dy gola vendimtarë. Edhe pse u ndodhën në disavantazh që në minutat e para, futbollistët e drejtuar nga Jorge Almiron treguan karakter të fortë. Ishte pikërisht "El Fideo" ai që restauroi ekuilibrin në fushë, duke realizuar një gol spektakolar me goditje dënimi në minutën e 23-të për t'i dhënë fund avantazhit fillestar të kundërshtarëve (1-1). Vrulli i argjentinasit nuk u ndal me kaq. Pak para se të mbyllej fraksioni i parë i lojës, saktësisht në minutën e 45’+12, ai u tregua i pagabueshëm nga pika e bardhë e penalltisë, duke përmbysur shifrat dhe kaluar skuadrën e tij në epërsi (2-1). Më pas, triumfi u vulos përfundimisht në kohën shtesë, kur Julian Fernandez shënoi golin e tretë në minutën e 90’+6, duke vulosur shifrat përfundimtare 3-1 në favor të Rosario Central. Ky sukses shënon një tjetër trofe të rëndësishëm për Di Marian te klubi i zemrës, ku u rikthye në korrik të vitit 2025. Ky është titulli i tij i dytë me fanellën e kësaj skuadre, pasi më parë kishte fituar edhe kampionatin e ligës po në vitin 2025. Arritja e mbrëmjes së djeshme ka një peshë të dyfishtë për klubin, pasi përveç trofeut, u siguroi edhe një biletë për në edicionin e parë historik të Recopa de Campeones (Kupës së Fituesve të Kupave), turne i ri që pritet të inaugurohet në vitin 2027 me pjesëmarrjen e tri skuadrave. Përballja për Superkupën e Argjentinës vuri përballë kampiones në fuqi të kampionatit për vitin 2025, Rosario Central, kundër fituesit të Trofeut të Kampionëve, Estudiantes.