Goditje në janar: PSG ndan 50 milionë euro për pasardhësin e Kvaratskhelias

Paris Saint-Germain duket se do të jetë ndër klubet më aktive në afatin kalimtar dimëror, duke planifikuar lëvizje të rëndësishme në treg pas dëmtimit të rëndë të Khvicha Kvaratskhelias. Sipas burimeve ndërkombëtare, drejtuesit e kampionëve të Fracës kanë vënë syrin te talenti i Bayer Leverkusenit, Ibrahim Maza, i cili shihet si zëvendësuesi ideal për të mbuluar hapësirën e lënë bosh nga sulmuesi gjeorgjian, sezoni i të cilit rrezikon të ketë përfunduar para kohe. Kvaratskhelia pësoi një dëmtim tejet serioz gjatë përballjes së zjarrtë në Ligën e Kampionëve kundër Barcelonës, sfidë kjo ku parizienët triumfuan me shifrat 4:2 më 20 tetor. Ekzaminimet mjekësore kanë konfirmuar se futbollisti ka këputur ligamentin e kryqëzuar të përparmë, një diagnozë kjo që e detyron të qëndrojë larg fushave të blerta për një periudhë afatgjate. Ky ngërç përbën një sprovë të vështirë për trajnerin Luis Enrique dhe planet e tij, duke marrë parasysh peshën dhe kontributin e madh që sulmuesi ka dhënë në ecurinë pozitive të skuadrës në arenën evropiane. Megjithatë, struktura drejtuese e klubit francez është vënë menjëherë në lëvizje për të gjetur një zgjidhje të shpejtë. Për ta siguruar shërbimin e 20-vjeçarit Ibrahim Maza, gjiganti francez është i gatshëm të hedhë në tavolinë një ofertë prej rreth 50 milionë eurosh. I riu ka spikatur me paraqitjet e tij këtë edicion te skuadra gjermane e Bayer Leverkusenit. Në vetëm nëntë paraqitje, ai ka kontribuar me tri gola dhe tri asistime, duke dëshmuar se posedon cilësitë e duhura për të bërë diferencën në fazën sulmuese. Tani mbetet për t'u parë nëse Parisi do ta zyrtarizojë ofertën në muajin janar dhe nëse drejtuesit e klubit nga Gjermania do të pranojnë të ulen në tavolinën e negociatave për shitjen e perlës së tyre.