Osmani: Trashëgimia jonë historike lidh emrin e Adem Jasharit me atë të Ibrahim Rugovës

Ish-presidentja e vendit dhe njëherësh deputetja e Lidhjes Demokratike të Kosovës (LDK), Vjosa Osmani, ka theksuar se Ushtria Çlirimtare e Kosovës (UÇK) përbën krenarinë tonë kombëtare dhe nuk duhet të shndërrohet në një mjet për sulme e linçime politike. Duke komentuar debatet rreth projektligjit për ruajtjen e vlerave të luftës së UÇK-së, ajo vlerësoi se epopeja çlirimtare kërkon respekt të përjetshëm, por njëkohësisht u shpreh kundër tentativave për ta monopolizuar këtë periudhë të lavdishme të historisë. “UÇK-ja është krenari kombëtare, jo instrument linçimi politik. Ajo meriton nderim të përhershëm sepse ishte betimi i përgjakur i një populli që sakrifikoi gjithçka për liri”, ka shkruar Osmani në reagimin e saj. Ajo ka shtuar se drejtësia e qëndrimeve politike nuk duhet të vlerësohet nga duartrokitjet e masës apo nga ashpërsia e fushatave fshirëse, duke argumentuar se kthimi i ligjit i la hapësirën propagandës pa fakte konkrete. Sipas vlerësimit të saj, përpjekjet për të fshehur të vërtetën u orientuan drejt sulmeve politike ndaj LDK-së, e cila sipas saj përfaqëson subjektin që vendosi gurthemelin e lirisë, shtetësisë dhe demokracisë në Kosovë. Po ashtu, ajo ka hedhur poshtë krahasimet e padrejta mes LDK-së dhe Listës Serbe, si dhe pretendimet se kjo forcë politike ushqen ndjenja urrejtjeje ndaj UÇK-së. “Partinë e Ibrahim Rugovës e barazuat me Listën Serbe, me grupin kriminal që kreu agresion ndaj Kosovës, e madje na akuzuat se e urrejmë UÇK-në”, ka deklaruar ajo. Osmani ka përsëritur se akti i mbrojtjes së luftës nuk duhet të ngatërrohet me ambiciet për ta përvetësuar atë për përfitime të ngushta politike. Në mbyllje të qëndrimit të tyre, ajo ka rikujtuar rëndësinë e figurave kyçe të historisë më të re të vendit, duke përmendur komandantin legjendar të UÇK-së, Adem Jasharin, dhe ish-presidentin historik Ibrahim Rugova. “Por mos e ngatërroni mbrojtjen e luftës me monopolizimin e saj. Nëse ka një të vërtetë që duhet ta kujtojmë gjithmonë, është kjo: krenaria jonë më e madhe është një histori që bashkon Adem Jasharin, Komandantin e UÇK-së, me Ibrahim Rugovën, Komandantin Suprem të luftës sonë çlirimtare. Secili në rrugën e vet, i shërbyen idealit të lirisë së Kosovës”, ka shkruar Osmani. “Kjo është historia jonë. E përbashkët! E shenjtë! Dhe atë askush nuk ka të drejtë ta përvetësojë”, ka përfunduar ajo.