Masat e rrepta në Vjenë: Autoritetet austriake ndalojnë flamujt e UÇK-së dhe ata kuq e zi për tifozët 'Dardanë'

Një fluks i madh i tifozëve shqiptarë është vërejtur pranë hyrjeve të stadiumit "Ernst Happel" në kryeqytetin e Austrisë, para fillimit të ndeshjes së radhës. Sipas informacioneve nga terreni, autoritetet vendase kanë ndërmarrë masa të rrepta sigurie, duke ushtruar kontrolle intensive ndaj dashamirësve të futbollit që po hynë në ambientet sportive. Gjatë kontrolleve në hyrje të stadiumit, tifozëve të Përfaqësueses së Kosovës, të njohur si "Dardanët", u është ndaluar futja e simboleve kombëtare, konkretisht e flamujve kuq e zi dhe atyre të Ushtrisë Çlirimtare të Kosovës. Kjo sfidë sportive, e cila vlen për edicionin e ri të Ligës së Kombeve, është parashikuar të nisë nga ora 18:00 në Vjenë. Kujtojmë se si Kosova, ashtu edhe Austria, vijnë në këtë përballje pas suksesit në ndeshjet e tyre paraprake në këtë kompeticion, ku secila skuadra ka arritur të grumbullojë nga tri pikë.