Ndryshon skenari për Shqipëri-Finlandë: Ja si do të ndahen biletat në “Air Albania”

Kombëtarja shqiptare do të presë në fushën e saj Finlandën më 12 nëntor, në një ndeshje që do të startojë nga ora 20:45 në impiantin modern “Air Albania”. Kjo përballje e rëndësishme është e vlefshme për javën e pestë të Grupit C1 në Ligën e Kombeve, ku kuqezinjtë synojnë paraqitje sa më pozitive. Fillimisht, pas hedhjes në treg të të gjitha biletave, pati aludime se shkallët e stadiumit do të populloheshin ekskluzivisht nga mbështetësit kuqezinj, një situatë kjo mjaft e rrallë për ndeshjet ndërkombëtare. Megjithatë, burime zyrtare kanë hedhur dritë mbi rregulloren e ndeshjes, duke ndryshuar panoramën e deritanishme. Sipas direktivave zyrtare, tifozëve miq u takon 5% e kapacitetit total të stadiumit. Më konkretisht, bëhet fjalë për sektorët V201 dhe V202. Edhe pse këto hapësira shfaqen të lira në sistemin e shitjes, biletat online për këtë zonë do të mund të sigurohen vetëm nga shtetasit finlandezë. Ndërkohë, interesi nga publiku është masiv dhe arena kryesore e vendit pritet të jetë e mbushur plot, ndërsa deri më tani janë shitur tashmë mbi 15 mijë bileta.