Dublin-i planifikon zgjerimin e pranisë ushtarake në Ballkan, në fokus Kosova dhe Bosnja

Autoritetet irlandeze po analizojnë seriozisht mundësinë e shtimit të ndjeshëm të kontingjentit të tyre ushtarak në kuadër të misionit paqeruajtës të NATO-s në Kosovë (KFOR), si dhe në operacionin e Bashkimit Evropian në Bosnjë-Hercegovinë (Althea). Kjo lëvizje vjen si pasojë e largimit të planifikuar të trupave nga Lindja e Mesme. Sipas të dhënave aktuale, vetëm rreth 13 ushtarë nga Irlanda janë të angazhuar në KFOR, ndërkohë që grupet e planifikimit ushtarak tashmë kanë nisur shqyrtimin e modaliteteve për dërgimin e trupave shtesë në të dyja këto zona ballkanike. Megjithatë, bisedimet ndodhen ende në fazën e hershme dhe ende nuk ka shifra zyrtare se sa pjesëtarë të forcave të armatosura mund të dislokohen në Kosovë dhe Bosnjë-Hercegovinë. Ndryshimi i fokusit strategjik të Dublinit vjen pas vendimit për të tërhequr gradualisht mbi 300 ushtarë irlandezë nga misioni paqeruajtës i OKB-së në Libanin jugor (UNIFIL). Ky proces tërheqjeje, i parashikuar të nisë në muajt e parë të vitit të ardhshëm, do t'i japë fund një pranie ushtarake katërdekadëshe e gjysmë në atë rajon. Strukturat ushtarake të vendit i kanë bërë thirrje ekzekutivit që të sigurojë teatro të reja operacionesh ndërkombëtare, me qëllim që t'i ofrohen mundësi angazhimi personelut ushtarak dhe të ruhet kapaciteti operativ në terren. Gjenerallejtënant Rossa Mulcahy, në cilësinë e Shefit të Shtabit të Forcave të Mbrojtjes të Irlandës, ka prauar se mbyllja e kapitullit në Liban do të sjellë vështirësi për ushtrinë, por ka theksuar se kjo nuk do të përbëjë fundin e kontributit global të vendit në fushën e paqes. Përforcimi i mundshëm i trupave në KFOR dhe në misionin Althea mund të ndodhë edhe nën kushtet e mekanizmit të njohur si “miratimi i trefishtë” (Triple Lock), duke qenë se të dyja këto nisma gëzojnë legjitimitet nga Kombet e Bashkuara. Ky rregull detyron ekzistencën e një mandati nga OKB-ja në rast se Irlanda dëshiron të dërgojë më shumë se 12 ushtarë jashtë kufijve. Aktualisht, qeveria irlandeze ka shprehur synimin për ta shfuqizuar këtë kusht ligjor, me argumentin se ai i jep të drejtë Rusisë dhe Kinës, si anëtare me të drejtë vetoje në Këshillin e Sigurimit, që të pengojnë dislokimin e ushtarëve irlandezë. Nga ana tjetër, subjektet opozitare e kundërshtojnë këtë nismë, duke e cilësuar mekanizmin Triple Lock si garanci kryesore për mbrojtjen e neutralitetit shtetëror të Irlandës.