LSDM: Nën udhëheqjen e Mickoskit, paga minimale nuk mbulon as ushqimin dhe një e treta e punëtorëve jetojnë në varfëri

Paga minimale aktuale nuk arrin të sigurojë as shpenzimet elementare për ushqim dhe pije të një familjeje katër-anëtarëshe, sipas akuzave të fundit të Lidhjes Socialdemokrate të Maqedonisë (LSDM), e cila thekson se 33% e punonjësve në vend përballen me varfërinë. Sipas të dhënave të paraqitura nga kjo parti, gjatë muajit tetor qytetarët kishin nevojë për 26,170 denarë vetëm për lëndët e para ushqimore, ndërsa krahasuar me muajin janar, shpenzimet për ushqim dhe pije janë shtuar për afro 2,000 denarë. Kostoja totale e shportës së konsumatorit tashmë i kalon 70,000 denarë, shifër kjo që ngjitet mbi 90,000 denarë nëse llogaritet edhe qiraja apo kësti i banesës, duke bërë që as tri paga së bashku të mos mjaftojnë për të mbuluar nevojat më elementare të jetesës. Nga LSDM vënë në dukje se punëtorët në vend po mbijetojnë me vështirësi përmes të ardhurave që radhiten ndër më të ulëtat në nivel evropian. Nga gjithsej 540,000 të punësuar, rreth 180,000 prej tyre shpërblehen me më pak se 31,200 denarë në muaj, çka dëshmon se një e treta e fuqisë punëtore jeton poshtë kufirit të varfërisë, pavarësisht angazhimit dhe përpjekjeve të përditshme për një jetë me dinjitet. Në vend të masave konkrete për ngritjen e të ardhurave të qytetarëve, nga opozita akuzojnë ekzekutivin se po planifikon prurjen e punëtorëve të huaj si fuqi punëtore e lirë. Partia përmend deklaratat e zyrtarëve, ku sipas tyre, Nikollovski flet për 50,000 ndërsa Mickoski për mbi 100,000 punëtorë ekonomikë të huaj.