Rama paralajmëron ndëshkumë të rreptë për dhunuesit: Faturën e dëmeve do ta mbulojnë familjet

Kryeministri i Shqipërisë, Edi Rama, gjatë një takimi me drejtuesit e bankave të nivelit të dytë, ka deklaruar se sulmet e fundit ndaj degëve të sistemit bankar kishin për qëllim shkaktimin e kaosit në funksionimin financiar të vendit. Gjatë fjalës së tij, ai theksoi se treguesit ekonomikë mbeten mjaft premtues dhe se Shqipëria shënon rritjen më të lartë në rajon, duke u afruar ndjeshëm me ekonomitë që dikur e kishin përpara. Duke iu referuar incidenteve, kreu i qeverisë u shpreh se personat që sulmuan me gurë dhe zjarr institucionet financiare kishin për qëllim nxitjen e panikut, ndërsa shtoi se bankomatet e dëmtuara do të rikthehen në funksion brenda një kohe të shkurtër përmes investimeve në teknologji, e cila do të shërbejë edhe për identifikimin e autorëve. Rama lëshoi një paralajmërim të fortë për autorët e dhunës, duke theksuar se ata do të ndiqen këmba-këmbës pavarësisht kapuçëve. Ai bëri të ditur se faturat financiare për dëmet e shkaktuara nga të miturit do t’i faturohen familjeve të tyre, praktikë kjo e ndjekur edhe në vende si Italia apo Franca. Gjithashtu, ndaj dhunuesve do të aplikohen masa të rrepta, përfshirë krijimin e një regjistri të posaçëm, kufizimin e aksesit në transport dhe bashkëpunimin me vendet e Bashkimit Evropian për ndalimin e lëvizjeve të tyre jashtë vendit. Në përmbyllje, kryeministri vuri theksin te dialogu dhe ballafaqimi i argumenteve si e vetmja rrugë e zhvillimit, duke e krahasuar situatën aktuale me protestën e studentëve dhe pedagogëve në vitin 2018, dhe duke kritikuar ata persona që, sipas tij, para se të jenë pedagogë, shërbejnë si militantë partiakë.