OKB i bën thirrje Tiranës zyrtare: Ndaloni dhunën dhe nisni dialogun me protestuesit

Komisioneri i Lartë i Kombeve të Bashkuara për të Drejtat e Njeriut, Volker Türk, ka reaguar ashpër ndaj situatës së tensionuar dhe përdorimit të forcës gjatë protestave në Shqipëri. Në një deklaratë zyrtare, ai ka dënuar çdo formë të dhunës, duke kërkuar nga autoritetet shtetërore dhe palët e përfshira të shmangin përplasjet dhe të kthehen te qetësia. Sipas zyrtarit të lartë të OKB-së, zgjidhja e krizës nuk mund të vijë përmes masave represive, por vetëm përmes hapjes së një dialogu të mirëfilltë me qytetarët dhe rininë. Türk theksoi se përshkallëzimi i dhunës duhet të marrë fund menjëherë, duke i bërë thirrje të gjitha palëve që të ulin tensionet në favor të një komunikimi gjithëpërfshirës dhe të sigurt. Në mesazhin e tij, Volker Türk vuri theksin te detyrimi që ka shteti për t’iu përgjigjur kërkesave sociale dhe ekonomike të popullatës. Ai kërkoi angazhim konkret nga institucionet për të adresuar shqetësimet legjitime që lidhen me pabarazinë, koston e lartë të jetesës, si dhe mangësitë në sistemin arsimor, shërbimet publike dhe strehim. “Shtetet kanë për detyrë të angazhohen me protestuesit, sidomos me të rinjtë, përmes një dialogu konstruktiv. Nevojiten hapa të prekshëm për të zgjidhur çështjet thelbësore të të drejtave të njeriut që po prekin përditshmërinë e qytetarëve shqiptarë,” deklaroi ndër të tjera kreu i OKB-së për të Drejtat e Njeriut.