A ekziston realisht Bashkimi Evropian? Sfidat e unitetit dhe përçarjet e brendshme

Në letër, Bashkimi Evropian ekziston si një formalitet, mirëpo në praktikë, në përmbajtje dhe në veprim, ky unitet mungon dukshëm. Kjo realitet po dëshmohet dita-ditës në arenën ndërkombëtare, ku vendimet dhe qëndrimet e përbashkëta shpesh mbeten vetëm në nivel letrash. Pika e parë dhe më e qartë e kësaj mungese uniteti u pa me çështjen e Kosovës. Si një bllok i unifikuar, ose të gjitha shtetet anëtare do të duhej ta njihnin pavarësinë e saj, ose asnjëra. Për më tepër, kur Gjykata Ndërkombëtare e Drejtimit (GJND) konfirmoi se shpallja e pavarësisë së Kosovës nuk ka shkelur asnjë ligj ndërkombëtar, qëndrimi i vendeve mosnjohëse përbën një shpërfillje jo vetëm ndaj Kosovës, por edhe ndaj vetë GJND-së, e cila u thirr pikërisht me kërkesë të Serbisë. Statistikisht, rreth 81.48 për qind e vendeve të Bashkimit Evropian e kanë njohur Republikën e Kosovës, kundrejt vetëm 18.52 për qind që nuk e kanë bërë një gjë të tillë. Megjithatë, paradoksalisht, kjo pakicë prej 18 për qindëshi arrin të dominojë mbi shumicën dërrmuese, duke penguar që BE-ja ta trajtojë Kosovën si shtet të barabartë. Argumente shtesë për çarjet e brendshme të BE-së shihen te qëndrimet ndaj Rusisë. Më parë pati shqetësime lidhur me veprimet e kryeministrit të Hungarisë, i cili ka vepruar jashtë politikave uniatare të bllokut, duke mos i zbatuar apo duke lehtësuar sanksionet ndaj Moskës. Së fundmi, një situatë e ngjashme është krijuar edhe me Sllovakinë, e cila ka nisur rivendosjen e marrëdhënieve ushtarako-diplomatike me Rusinë për herë të parë që nga viti 2022. Takimi i kryeministrit Robert Fico me Vladimir Putin në Kremlin dëshmon synimin për të zgjeruar bashkëpunimin përtej furnizimit me energji, pikërisht në kohën kur Brukseli kërkon forcimin e sanksioneve ndaj Rusisë. Një organizatë e bashkuar duhet të veprojë si një trup i vetëm, por në BE po vërehen çarje të thella. Pakica e vogël e shteteve anëtare ndjek interesa të ndryshme, ndërsa shumica nuk po arrin të ushtrojë ndikim apo t'i japë fund këtyre divergjencave. Një lëshim tjetër i diskutueshëm nga ana e bllokut evropian ka qenë lejimi i kandidimit dhe zgjedhjes si eurodeputet i shtetasit shqiptar Fredi Beleri, i cili në atë kohë ndodhej i burgosur në Shqipëri për vepra penale. Ky veprim ngre pikëpyetje të mëdha mbi standardet e BE-së, duke marrë parasysh se Shqipëria nuk është ende anëtare e bllokut dhe se Greeqia kishte mjaftueshëm kandidatë të tjerë për ta përfaqësuar.