U kapën me barna e teknologji të sjellë nga Maqedonia e Veriut: Përfundojnë në pranga dy persona në Fushë Kosovë

Autoritetet policore në Fushë Kosovë kanë arrestuar dy persona, të cilët dyshohen për përfshirje në kontrabandë mallrash dhe shmangie nga pagesat e detyrimeve doganore. Aksioni është zhvilluar mbrëmjen e djeshme rreth orës 22:40, pasi zyrtarët nga Sektori i Hetimeve të Policisë Kufitare kanë ndaluar për një kontroll rutinor një automjet transportues (kombi) me targa vendore, në të cilin po udhëtonin dy burrat e dyshuar. Gjatë kontrollit të detajuar të mjetit, pjestarët e rendit kanë zbuluar një sasi të konsiderueshme artikujsh të shumëllojshëm. Në ngarkesë përfshiheshin barna, produkte higjienike, bizhuteri, veshmbathje, si dhe pajisje të ndryshme teknologjike, përfshirë kompjuterë, laptopë dhe telefona celularë. Gjatë procesit të intervistimit, të arrestuarit kanë pranuar se sasinë e mallrave e kishin futu nga territori i Maqedonisë së Veriut, mirëpo nuk kanë arritur të ofrojnë asnjë dokumentacion përkatës që do të dëshmonte hyrjen e ligjshme të tyre në vend. Me vendim të prokurorit kompetent, automjeti transportues bashkë me të gjithë ngarkesën janë sekuestruar në cilësinë e provave materiale, ndërsa dy të dyshuarit janë dërguar në mbajtje për procedurat e mëtejshme ligjore.