Revolta studentore në ditën e pestë: Uashingtoni godet korrupsionin në Tiranë dhe kërkon maturi

Protestat e studentëve në Tiranë kanë hyrë në ditën e tyre të pestë, duke nxitur një reagim të fuqishëm dhe të sinkronizuar nga kryeqyteti amerikan. Mesazhet e ardhura nga tri figura të larta të Kongresit amerikan, të shoqëruara edhe me një qëndrim zyrtar të Ambasadës së SHBA-së, e vendosin theksin te korrupsioni dhe dështimi i shtetit të së drejtës si shkaqet kryesore të kësaj revolte. Ndër zërat më kritikë ishte ai i kongresmenit republikan Keith Self, kryetar i Nënkomisionit për Europën, i cili u shpreh se kjo protestë përfaqëson "kulmin e mosbesimit të qytetarëve ndaj politikanëve të korruptuar dhe të lodhjes nga shpërfillja totale e shtetit të së drejtës". Self nënvizoi se drejtuesit e vendit duhet t'u përgjigjen me seriozitet kërkesave për reforma thelbësore, të cilat janë tejet të nevojshme për zhvillimin ekonomik dhe stabilitetin e rajonit. Sipas tij, mllefi i rinisë nuk lidhet thjesht me ngjarjet e ditëve të fundit, por është rrjedhojë e drejtpërdrejtë e dështimeve sistemike. Nga ana tjetër, kongresmeni Joe Wilson deklaroi se po e ndjek me shqetësim të madh gjendjen në Shqipëri, si një vend aleat i NATO-s. Ai nënvizoi se "populli shqiptar meriton liri, sundim të ligjit dhe llogaridhënie institucionale", duke i bërë thirrje ekzekutivit që të shmangë çdo akt dhune ndaj manifestuesve dhe duke theksuar se të rinjtë duhet të kenë fjalën e tyre në ndërtimin e të ardhmes së vendit. Pjesë e këtij presioni politik u bë edhe kongresmeni Robert Aderholt, i cili shprehu alarmimin e tij për përshkallëzimin e tensioneve. Ai u bëri thirrje të gjitha palëve përfshirëse të distancohen nga aktet e dhunshme, ndërsa kërkoi nga autoritetet që të garantojnë të drejtat e protestuesve paqësorë, duke ritheksuar rëndësinë e përfshirjes së rinisë në proceset vendimmarrëse. Këto deklarata të njëpasnjëshme përbëjnë një sinjal të qartë presioni politik nga SHBA. Ndryshe nga thirrjet rutinë për qetësi, ligjvënësit amerikanë kanë identifikuar qartë burimin e problemit: korrupsionin dhe cenimin e sundimit të ligjit. Megjithëse studentët u ngritën fillimisht për kostot e larta të arsimit dhe mungesën e perspektivës në punësim, mesazhet e ligjvënësve amerikanë e ngrenë këtë revoltë në nivelin e një pakënaqësie të përgjithshme ndaj kastës politike. Po ashtu, Ambasada e SHBA-së në Tiranë doli me një deklaratë të balancuar, por të fortë: "Dhuna, trazirat, lëndimi fizik i të tjerëve dhe shkatërrimi i pronës nuk janë angazhim qytetar. U bëjmë thirrje të gjithë qytetarëve që zgjedhin të demonstrojnë ta ushtrojnë të drejtën e tyre për protestë në mënyrë paqësore, pa akte të dhunshme. U bëjmë thirrje të gjitha palëve për vetëpërmbajtje dhe qetësi." Ndërsa selia diplomatike amerikane u përqendrua te ruajtja e rendit dhe shmangia e përplasjeve, kongresmenët shkuan në thelb të problemit politiko-shoqëror. Në këtë ditë të pestë të revoltës, mesazhet nga SHBA rrisin dukshëm presionin ndërkombëtar mbi qeverinë shqiptare dhe u japin më shumë peshë kërkesave të studentëve për ikjen e Ramës dhe ndërtimin e një shteti funksional. Përfundimi është i qartë: Uashingtoni e dëgjoi thirrjen e rinisë shqiptare. Tani i mbetet Tiranë zyrtare të dëgjojë po ashtu – jo përmes forcinimit të policisë, por përmes përgjigjeve të plota politike.