Prapaskenat e bujshme: Agjenti i Nico Williams tregon pse sulmuesi spanjoll refuzoi Barcelonën dhe gjigantët evropianë

Nico Williams vazhdon të dëshmojë se është ndër figurat më besnike në futbollin bashkëkohor, duke i dhënë përparësi të ardhmes së tij afatgjatë te Athletic Club, pavarësisht vëmendjes së madhe nga klubet më elitare të kontinentit. Përfaqësuesi i anësorit spanjoll ka hedhur dritë mbi arsyet reale që e shtynë lojtarin të anashkalonte ofertat joshëse nga La Liga dhe Premierliga. Në fakt, agjenti i Williams ka konfirmuar publikisht se reprezentuesi i Spanjës kishte hedhur poshtë ofertat nga Liverpooli dhe Arsenali tash e dy vjet më parë. Futbollisti 24-vjeçar mbetet një nga gurët e themelit në projektin e Athletic Club, pasi ka vulosur besnikërinë e tij ndaj klubit të stadiumit “San Mames” përmes një marrëveshjeje spektakolare 10-vjeçare, e cila do të skadojë në vitin 2035. Ky vendim u mor pikërisht në kohën kur sulmuesi ishte ndër talentet më të kërkuara në treg, i nxitur nga një periudhë e artë me trofe si në rrafshin e klubit ashtu edhe me kombëtaren. Ylli shpërthyes u gjodh në syrin e ciklonit të spekulimeve gjatë merkatos së verës 2024, menjëherë pas kontributit të tij kyç në triumfin e Spanjës në Kampionatin Evropian. Duke kurorëzuar një vit fantastik, Williams shënoi në ndeshjen finale kundër Anglisë, sukses të cilin e shoqëroi edhe me fitimin e Kupës së Mbretit fanellën e Athletic. Felix Tainta, menaxheri i lojtarit, foli hapur për shkallën e interesimit gjatë një paraqitjeje në podkastin “Los Fulanos”, duke bërë të ditur se në garë kishin hyrë pothuajse të gjithë gjigantët e futbollit evropian. “Të gjithë e dimë për interesimin e Barcelonës në verën e vitit 2024, pas Kampionatit Evropian”, shpjegoi Tainta gjatë bisedës. “Barcelona, Arsenali, Bayerni (i Munichut), Liverpooli, Paris Saint-Germaini… Mund t’i përmend të gjithë. Të gjithë e dëshironin Nicon dhe nuk është e lehtë që një lojtar t’i refuzojë të gjitha këto klube. Më pas, biseduam me Barcelonën. Athletici e dinte këtë, sepse i mbaja të informuar gjatë gjithë kohës për situatën, edhe pse ata ishin të zemëruar me Barcelonën për mënyrën se si po vepronte. Pas kësaj, i nisa bisedimet”, tha ai. Megjithëse Liverpooli dhe Arsenali ishin konkurrentë seriozë, ishte pikërisht Barcelona ajo që insistoi më shumë për të siguruar shërbimet e anësorit. Klubi katalunas synonte me çdo kusht që Williams të bashkohej në fushë me shokun e tij të kombëtares, Lamine Yamal, mirëpo operacioni dështoi përfundimisht si pasojë e krizës dhe paqëndrueshmërisë financiare të Blaugranëve. Tainta zbuloi se pengesa kryesore për kampin e lojtarit ishte pamundësia e drejtuesve katalunas për të ofruar garanci zyrtare rreth regjistrimit të tij në La Liga, për shkak të buxhetit të mbingarkuar nga pagat. Përfaqësuesi nënvizoi se një sportist i nivelit të Williamsit nuk mund të rrezikonte të përfundonte në tribunë për shkak të ngërçeve administrative. “Erdhi një moment gjatë negociatave, në këtë situatë, kur Nico nuk mund të mbetej pa minuta në fushë”, shtoi Tainta. “Nico është një veturë e Formula 1. Nëse vij në shtëpinë tënde, nuk mund ta marr përsipër problemin tënd. Dhe këtë ia bëra të qartë Barcelonës”, përfundoi ai.