Tragjedia nga sulmi i tigrit në Britani: Nis hetimi për shkeljen e konfidencialitetit të dosjes mjekësore të viktimës

Autoritetet në Britaninë e Madhe kanë nisur një hetim zyrtar lidhur me dyshimet se dy punonjës të Shërbimit të Ambulancës së Yorkshire kanë tentuar të hyjnë në mënyrë të paligjshme në të dhënat shëndetësore të Uilliam Chapman, 24-vjeçarit i cili humbi jetën tragjikisht pas sulmit të një tigri në Yorkshire Uildlife Park. Përmes një njoftimi zyrtar, ky institucion ka bërë të ditur se kontrollet e brendshme kanë zbuluar dy raste të mundshme të aksesimit ose tentativës për të siguruar informacione lidhur me dosjen mjekësore të të ndjerit. Këto raste janë tashmë nën shqyrtim për të zbardhur plotësisht rrethanat se si kanë ndodhur. Shërbimi i Ambulancës së Yorkshire ka theksuar se ruajtja e privatësisë dhe e të dhënave të pacientëve mbetet prioritet absolut. Për këtë arsye, ngjarja i është referuar zyrtarisht Zyrës së Komisionerit për Informacionin, ndërkohë që familja e 24-vjeçarit është vënë në dijeni për këto zhvillime dhe do të informohet vazhdimisht për ecurinë e hetimeve. Uilliam Chapman ndërroi jetë të shtunën, pasi kapërceu dy pengesa mbrojtëse për të hyrë në hapësirën e tigrave brenda parkut pranë Doncaster. Sipas dëshmive të paraqitura pranë Gjykatës së Mjekësisë Ligjore në Doncaster, shkaku i vdekjes ishin plagët e rënda traumatike të marra gjatë sulmit të kafshës. Menjëherë pas ngjarjes, stafi i parkut neutralizoi bishën, ndërsa ekipet mjekësore të emergjencës që mbërritën në vendngjarje mundën vetëm të konfirmonin ndërrimin e jetës së të riut. Gjatë seancës gjyqësore u bë e ditur gjithashtu se Chapman vuante nga probleme të shëndetit mendor, ishte diagnostikuar me skizofreni dhe kishte pasur episode të mëparshme psikoze. Edhe pse ndiqjesh nga shërbimet e shëndetit mendor në Doncaster, ai vlerësohej si individ i pavarur dhe nuk kishte nevojë për asistencë të përditshme. Procedura hetimore e nisur për të dhënat mjekësore ka për qëllim të konkludojë nëse stafi ka bërë shkelje të rregullave të konfidencialitetit dhe të përcaktojë masat përkatëse disiplinore në rast se dyshimet vërtetohen.