Investim prej 81 milionë eurosh në efiçiencë: Mbi 200 mijë familje kosovare përfitojnë nga paketa energjetike

Një fond prej 81 milionë eurosh ka sjellë ndryshime të ndjeshme në peizazhin energjetik për mijëra ekonomi familjare dhe ndërmarrje vendase. Pakoja e Mbështetjes për Energjinë ka shtrirë ndihmën e saj te më shumë se 200 mijë familje dhe 154 biznese, duke u dhënë mundësi atyre të realizojnë izolimin e objekteve, zëvendësimin e dritareve dhe vendosjen e pajisjeve efiçiente. Megjithatë, ky hap vjen në një periudhë kur vendi vazhdon të përballet me sfida të theksuara të shpenzimit të tepërt të rrymës. Ministrja e Energjisë dhe Ekonomisë, Artane Rizvanolli, theksoi se Kosova ende mbetet prapa kritereve evropiane në aspektin e kursimit të energjisë. “Vetëm gjatë dimrit 2024-2025 i kemi mbështetur 85 familje përmes programit konsumatorët e cenueshëm, ndërsa mbi 20 mijë familje me asistencë sociale i kemi mbështetur për blerje në lëndën e parë për ngrohje”, u shpreh Artane Rizvanolli, ministre e Energjisë. Nga ana e tij, ambasadori i Bashkimit Evropian në Kosovë, Dirk Schuebel, ritheksoi se BE-ja mbetet aleatja më e fuqishme dhe më e besueshme e vendit, si dhe donatorja më e madhe financiare. “Pakoja prej 75 milionë eurosh përfaqëson vetëm një pjesë të vogël të më shumë se 3.7 miliardë eurove që BE-ja ka investuar në Kosovë që nga viti 1999, si partnerja më e fortë dhe më e besueshme e Kosovës dhe ofruesja më e madhe e ndihmës financiare”, deklaroi Dirk Schuebel, ambasador i Bashkimit Evropian në Kosovë. “Përtej shifrave, rezultatet e tij maten me mijëra përfitues që sot gëzojnë kushte më të mira banimi, konsum më të ulët të energjisë dhe pagesë më të përballueshme”, u shpreh Njomza Hoxha, drejtoreshë e Fondit të Kosovës për Efiçiencë të Energjisë. Ky projekt dyvjeçar u mbështet me 75 milionë euro nga Bashkimi Evropian, ndërsa gjashtë milionë euro shtesë u siguruan nga buxheti i shtetit të Kosovës. Qëllimi kryesor i kësaj nisme ka qenë zbutja e disproporcioneve në konsum. Familjet përfituese kanë arritur të lehtësojnë faturat mujore përmes kursimit të energjisë për ngrohje, ndërkohë që 154 bizneset pjesëmarrëse kanë forcuar konkurrueshmërinë në treg falë shpenzimeve më të ulëta operative. Autoritetet vlerësojnë se këto ndërhyrje nuk mbrojnë vetëm buxhetin e qytetarëve, por edhe lehtësojnë ngarkesën mbi rrjetin elektroenergetik të Kosovës gjatë stinës së dimrit.