Ilir Shulku: Zhvillimi i mjekësisë sportive, bazë e sigurt për suksesin e futbollit tonë

Kryeqyteti shqiptar ka mirëpritur për herë të parë edicionin e Kongresit Ndërkombëtar të Mjekësisë dhe Teknologjisë Sportive, “MedSportTech International Congress 2026”. Ky aktivitet i rëndësishëm ka bashkuar në Tiranë ekspertë të njohur nga fusha e mjekësisë, shkencës së sportit, farmacisë dhe teknologjisë, të cilët po diskutojnë mbi sfidat bashkëkohore, risitë në kujdesin shëndetësor dhe maksimizimin e performancës së sportistëve. Programi i kongresit përfshin çështje kyçe si politika e UEFA-s për shëndetin e lojtarëve, metodat e parandalimit të dëmtimeve, masat antidoping, përdorimi i inteligjencës artificiale dhe teknikat e avancuara të rehabilitimit sportiv. Në këtë ngjarje mori pjesë edhe Sekretari i Përgjithshëm i Federatës Shqiptare të Futbollit, Ilir Shulku. Në fjalën e tij, mbajtur në emër të Presidentit Armand Duka dhe institucionit që përfaqëson, ai vlerësoi lart organizimin e kësaj nisme dhe mundësinë që ajo ofron për shkëmbimin e ekspertizës ndërkombëtare. “Është kënaqësi të jem sot mes jush, në një kongres që bashkon mjekësinë, shkencën e sportit dhe teknologjinë, tri fusha që po ndikojnë gjithnjë e më shumë në zhvillimin e sportit modern. Në emër të Presidenti Armand Duka dhe Federatës Shqiptare të Futbollit, përgëzoj organizatorët për këtë nismë dhe për krijimin e një platforme ndërkombëtare që sjell në Tiranë ekspertizë, përvojë dhe ide të reja për të ardhmen e mjekësisë sportive”, – u shpreh Shulku gjッタ fjalës së tij përshëndetëse. Duke vënë inxhinierinë mjekësore në funksion të fushës së blertë, Sekretari i Përgjithshëm i FSHF-së theksoi se ruajtja e integritetit fizik të lojtarëve përbën një nga shtyllat kryesore të futbollit bashkëkohor, ku ngarkesa e lartë e ndeshjeve kërkon vëmendje të jashtëzakonshme ndaj parandalimit të lëndimeve. “Për ne, si Federatë Futbolli, kjo temë ka rëndësi të veçantë. Nuk mund të flasim për futboll modern dhe performancë të lartë pa vendosur në qendër shëndetin e sportistit. Parandalimi i dëmtimeve, kujdesi mjekësor, rehabilitimi dhe rikthimi i sigurt në fushë janë pjesë thelbësore e përgatitjes së çdo futbollisti. Futbolli dhe sporti i sotëm kërkon gjithnjë e më shumë nga sportistët. Intensiteti i ndeshjeve, ngarkesa e stërvitjes dhe kalendari konkurrues e bëjnë të domosdoshme një qasje profesionale, ku ndërhyrja mjekësore nuk fillon vetëm kur ndodh dëmtimi, por shumë më herët, përmes parandalimit, monitorimit dhe vlerësimit të vazhdueshëm”, – shtoi ai. Gjatë fjalës së tij, Shulku vuri në dukje investimet konkrete që FSHF ka ndërmarrë kohët e fundit në këtë sektor, duke veçuar ngritjen e klinikës së Kombëtares si një qendër ekselence e pajisur me teknologjitë më të fundit për fizioterapinë dhe rikuperimin e shpejtë të lojtarëve. “Pikërisht në këtë drejtim, Federata Shqiptare e Futbollit ka ndërmarrë investime konkrete. Një prej tyre është klinika e Kombëtares, një qendër ekselence për mjekësinë sportive, e pajisur me teknologji të avancuar në fushën e fizioterapisë dhe rehabilitimit. Krijimi i kësaj qendre është pjesë e angazhimit tonë për të ngritur standardet e kujdesit ndaj futbollistëve dhe për t’u krijuar atyre kushte sa më të mira për vlerësim, trajtim dhe rikuperim. Për ne, ky investim nuk ka të bëjë vetëm me pajisjet apo infrastrukturën. Ka të bëjë me cilësinë e shërbimit dhe me krijimin e një mjedisi ku profesionistët mund të punojnë sipas standardeve bashkëkohore të mjekësisë sportive”, – përfundoi ai, duke theksuar synimin që këto standarde të shndërrohen në një model referimi edhe për klubet dhe akademi anembanë vendit.