Sezoni i ri i ngrohjes në Prishtinë: Rama paralajmëron zgjerim të rrjetit dhe zbatim të projektit 'Solar for Kosovo'

Kryetari i Prishtinës, Përparim Rama, ka njoftuar se furnizimi me ngrohje përmes ndërmarrjes 'Termokos' ka nisur pa probleme për sezonin 2026/2027, duke vënë theksin te domosdoshmëria e zgjerimit të rrjetit dhe rritjes së kapaciteteve në të ardhmen. Përveç kësaj, gjatë vizitës në terren, u shqyrtua edhe ecuria e projektit madhor 'Solar for Kosovo', me synim nisjen e shpejtë të punimeve për një ngrohje më të qëndrueshme dhe më ekonomike për qytetarët. “Tash ishim edhe me stafin tjetër teknik dhe na informuan që procesi tash i ngrohjes të kryeqytetit është duke shkuar në mënyrën më të mirë të duhur, pra nuk ka asnjë problem. Deri më tani, shpresoj që mos të ketë asnjë problem edhe në të ardhmen, me siguri që nuk do të ketë. Diskutuam po ashtu edhe për nevojën e zgjerimit të ngrohjes në pjesë të ndryshme të kryeqytetit, për kapacitetin ekzistues dhe si mundemi me e ngritë kapacitet në të ardhmen e afërt”, u shpreh Rama. Ai shtoi se nga gjithsej 25 mijë pika që aktualisht shfrytëzojnë dhe paguajnë shërbimet e 'Termokosit', rreth 17 mijë prej tyre tashmë janë të pajisura me matës, ndërsa synohet që ky investim të shtrihet edhe në 8 mijë pikat e mbetura për të përmbyllur këtë proces. “Biseduam po ashtu edhe për projektin madhor ‘Solar for Kosovo’ që është duke na pritur tash, që procesi duhet me ecë përpara sa më shpejt që është e mundur, që me fillu punët e mëdha atje, të cilat do t’i ndihmojnë kryeqytetit me u transformu ashtu sipas vizionit tonë në një qytet ambiental, një ngrohje e cila është më e mirë, më ambientale, më e lirë për qytetarët tanë. Dhe për gjëra tjera të ndryshme, mundësi tjera të ndryshme, se si mundemi me i ndihmu qytetarëve të kryeqytetit nëpërmjet kompanisë Termokosit, pra deri më tani shpresoj që të gjithë qytetarët që janë të kyçur në Termokos, edhe e ndjejnë ngrohjen, e cila në mënyrë linjare tash do të ketë ngritje në ditët me radhë, deri në pikën ku edhe monitorohet edhe me matësit, pra e dimë që tash prej 25 mijë pikave të cilat ekzistojnë sot dhe paguajnë për Termokos, 17 mijë prej tyre vetëm se i kanë matësit, kemi edhe një vazhdimësi të zgjerimit tash edhe për 8 mijë të tjera, që ta përmbushim këtë projekt”, theksoi ai. Në anën tjetër, kryeshefi i ri i 'Termokosit', Bersant Bekaj, bëri të ditur se autoritetet komunale dhe menaxhmenti janë duke analizuar nga afër situatën në secilën lagje, për të adresuar dhe zgjidhur menjëherë çdo sfidë të mundshme në furnizimin me ngrohje. “Tash jemi në procedurë të shikimit të problemit se çfarë ka secila lagje, i marrim raportet dhe i sqarojmë”, deklaroi Bekaj.