Komisionerja Marta Kos lëshon paralajmërimin e radhës për Kosovën: Ndryshimet ligjore për Specialen rrezikojnë rrugën evropiane

Procesi i integrimit evropian të Kosovës ka qenë në qendër të diskutimit mes kryenegociatorit Jeton Zulfaj dhe komisionares evropiane për Zgjerim, Marta Kos, në një takim të zhvilluar gjatë ditës së sotme. Nëpërmjet një deklarate të publikuar në platformën sociale X, zyrtarja e lartë e Bashkimit Evropian vlerësoi se, pavarësisht bllokadave dhe turbulencave institucionale që kanë shoqëruar vendin përgjatë dy viteve të fundit, institucionet kosovare kanë shënuar zhvillime pozitive. Ajo veçoi përparimet në reformat e sundimit të ligjit, zbatimin e Planit të Rritjes, si dhe përgatitjet teknike për t'u bërë pjesë e Zonës Unike të Pagesave në Euro (SEPA). Megjithatë, komisionarja Kos shprehu shqetësim të thellë dhe qëndrim kritik lidhur me zhvillimet e fundit legjislative, duke i cilësuar si të papranueshme ndryshimet e ndërmarra në legjislacionin që rregullon veprimtarinë e Dhomave të Specializuara të Kosovës. "Sot diskutova me kryenegociatorin Jeton Zulfaj rreth rrugëtimit të Kosovës drejt integrimit në BE. Pavarësisht paqëndrueshmërisë institucionale gjatë dy viteve të fundit, Kosova ka shënuar përparim në reformat që lidhen me sundimin e ligjit dhe Planin e Rritjes. Ajo ka bërë hapa të mirë drejt anëtarësimit në SEPA", u shpreh ajo fillimisht. Në vijim të mesazhit të saj, ajo paralajmëroi qartë se çdo veprim për miratimin dhe implementimin e këtyre ndryshimeve do të përbënte shkelje të hapur të angazhimeve që vendi ka marrë përsipër ndaj bllokut evropian. "Megjithatë, ndryshimet e fundit në ligjin për Dhomat e Specializuara të Kosovës janë të papranueshme. Miratimi dhe zbatimi i tyre do të binin ndesh me zotimet e Kosovës ndaj BE-së. Kjo do të përbënte një hap të rëndë prapa në rrugëtimin e Kosovës drejt BE-së. Respektimi i sundimit të ligjit dhe institucionet e pavarura gjyqësore janë thelbësore për përgatitjen e hapave të mëtejshëm në rrugëtimin e Kosovës drejt BE-së", përfundoi reagimi i komisionares Kos.