Përurimi i 70-vjetorit të Revolucionit Hungarez, Shiroka Pula: Kosova e çmon thellësisht vlerën e lirisë

Presidentja e Kosovës, Justina Shiroka Pula, ishte e pranishme në ceremoninë solemne të organizuar nga Ambasada e Hungarisë në vendin tonë, me rastin e shënimit të 70-vjetorit të Revolucionit Hungarez të vitit 1956. Gjatë fjalës së saj përshëndetëse, ajo çmoi lart vendosmërinë dhe guximin e popullit hungarez në betejën e tyre për liri, pavarësi dhe dinjitet njerëzor, duke nënvizuar se këto ideale përbëjnë një gurthemel të vlerave evropiane. “Qytetarët e Republikës së Kosovës e ndiejnë thellësisht peshën dhe kuptimin e lirisë për një shtet. Rrugëtimi ynë historik, duke filluar nga rezistenca e heroit tonë kombëtar Gjergj Kastrioti Skënderbeu, e deri te sakrifica sublime e Ushtrisë Çlirimtare të Kosovës dhe kurorëzimi me pavarësi, dëshmon përpjekjen e pandërprerë të shqiptarëve për vetëvendosje dhe dinjitet”, deklaroi e para e vendit. Më tej, ajo evokoi lidhjet e hershme historike mes dy kombeve, duke sjellë në vëmendje bashkëpunimin ndërmjet Gjergj Kastriotit Skënderbeut, Janosh Huniadit dhe mbretit Matias Korvini. Sipas shefes së shtetit, ky themel i përbashkët historik shërben si bazë e fortë për partneritetin e sotëm ndërmjet Prishtinës dhe Budapestit, i cili shtrihet në fusha kyçe si diplomacia, siguria, ekonomia dhe arsimi. Gjatë fjalimit, ajo veçoi mbështetjen e vazhdueshme të Hungarisë, e cila ishte ndër shtetet e para që njohu pavarësinë e Kosovës në mars të vitit 2008, ndërsa sot vijon të jetë e pranishme me mbi 400 ushtarakë në kuadër të misionit paqeruajtës të KFOR-it. Në fund, presidentja përmendi edhe rëndësinë e programit të bursave “Stipendium Hungaricum”, duke e cilësuar si një mundësi të shkëlqyer që u jepet gjeneratave të reja kosovare për ngritje akademike dhe shkëmbim kulturor.