Vlorë: Banorët e një pallati zbulojnë dy mina të fshehura në mure, dyshohen të jenë nga '97-ta

Një ngjarje e pazakontë dhe shqetësuese është regjistruar në qytetin e Vlorës, ku dy mjete shpërthyese janë konstatuar të fshehura brenda murit të një pallati katërkatësh, në lagjen “Pavarësia”. Sipas të dhënave paraprake, dyshohet se këto mina kanë qenë të vendosura në atë pozicion prej vitesh dhe mund t'i përkasin arsenalit të armëve të mbetura nga trazirat e vitit 1997. Zbulimi ka ndodhur gjatë pasdites, kur vetë banorët e ndërtesës kanë vënë re praninë e dy minave. Ato ndodheshin të fshehura në strukturën e murit, pranë matësve të energjisë elektrike, në pjesën e hyrjes së pallatit. Sipas dyshimeve të para, degradimi dhe dëmtimi i murit me kalimin e kohës ka bërë që mjetet shpërthyese të dalin në sipërfaqe dhe të bëhen të dukshme. I gjendur para kësaj situate alarmante, komuniteti i banorëve ka njoftuar pa humbur kohë autoritetet policore të qytetit bregdetar.