Samiti i Bakus: Disa shtete braktisin sallën gjatë fjalimit të presidentit izraelit

Gjatë punimeve të Samitit të 7-të të Konferencës për Ndërveprimin dhe Masat e Ndërtimit të Besimit në Azi (CICA), që po zhvillohet në Baku të Azerbajxhanit, u regjistrua një zhvillim i tensionuar diplomatik. Përfaqësuesit e Iranit, Turqisë, Kuvajtit, Pakistanit dhe Autoritetit Palestinez zgjodhën të largohen nga salla të enjten, në momentin kur kreu i shtetit izraelit, Isaac Herzog, ka nisur fjalimin e tij. Në këtë ngjarje, ku morën pjesë delegacione të nivelit të lartë nga e gjithë Asia dhe Lindja e Mesme – përfshirë vende që nuk mbajnë lidhje zyrtare diplomatike me Izraelin – vëmendje e veçantë u drejtua nga qëndrimi i Katarit. Derisa disa burime mediatike pretenduan se edhe delegacioni i këtij shteti ishte larguar, dëshmitarët okularë në sallë konfirmuan se emiri i Katarit, Sheikh Tamim bin Hamad Al Thani, ka preferuar të mbetet në vendin e tij dhe ka ndjekur fjalimin e Herzogut deri në fund. Ndërkohë, prezencën e tyre në sallë e ruajtën edhe përfaqësuesit e Bahreinit dhe të Emirateve të Bashkuara Arabe. Vendimi i emirit të Katarit për të mos e bojkotuar fjalimin nxiti kureshtje të madhe, sidomos duke pasur parasysh mungesën e raporteve zyrtare ndërmjet Dohas dhe Jerusalemit, si dhe angazhimin e Katarit në rolin e ndërmjetësuesit për çështje të ndjeshme gjeopolitike në rajon. Konferenca CICA është e projektuar si një platformë që synon inkurajimin e dialogut dhe bashkëpunimit mes kombeve anëtare, duke vënë theksin te siguria dhe paqja në kontinentin aziatik. Takimet e këtij niveli shërbejnë rregullisht si hapësirë për ballafaqimin e këndvështrimeve të ndryshme rreth dinamikave rajonale dhe globale. Në total, fjalimi i presidentit izraelit u bojkotua nga përfaqësuesit e më shumë se 10 shteteve, duke u shndërruar në ngjarjen kryesore të këtij samiti. Ky episod reflekton edhe një herë tensionet e theksuara ndërkombëtare lidhur me politikën e Izraelit, veçanërisht në dritën e konfliktit aktual në Gaza dhe krizës së gjera në Lindjen e Mesme.