Bilanci i rëndë i protestave në Tiranë, kreu i Policisë: 71 efektivë të lënduar gjatë tri ditëve të fundit

Drejtori i Përgjithshëm i Policisë së Shtetit, Skënder Hita, ka dalë në një konferencë të jashtëzakonshme për shtyp për të bërë një pasqyrë të situatës së sigurisë, pas tensioneve dhe protestave të dhunshme që kanë përfshirë kryeqytetin gjatë tri ditëve të fundit. Duke folur para gazetarëve, Hita u shpreh se Tirana ka rreth 72 orë që përballet me akte të rënda dhune, zjarrvënie dhe vandalizmi, të cilat kanë rrezikuar seriozisht jetën e qytetarëve dhe qetësinë publike. Sipas të dhënave zyrtare të bëra publike gjatë konferencës, si pasojë e përplasjeve kanë mbetur të plagosur 71 punonjës të policisë, ku disa prej tyre mbajnë dëmtime fizike më të rënda. Në fjalën e tij, kreu i Policisë së Shtetit theksoi se institucionet mbrojnë dhe respektojnë plotësisht të drejtën kushtetuese të çdo qytetari, studenti apo grupi politik për të protestuar në mënyrë paqësore, por paralajmëroi se e drejta e protestës nuk mund të përdoret si mburojë për të ushtruar dhunë dhe për të shkatërruar pronën publike e private.