Martinez sqaron deklaratat e ashpra ndaj drejtuesve të Unitedit, por refuzon të kërkojë falje

Mbrojtësi i Manchester Unitedit, Lisandro Martinez, ka dhënë shpjegime shtesë lidhur me fjalët e tij të bujshme të thëna pas disfatës 2-0 kundër Atlético Madridit në Ligën e Kampionëve, ndërkohë që ka vendosur të mos kërkojë falje publike për opinionet e shprehura ndaj strukturës drejtuese të klubit. Reprezentuesi argjentinas kishte shpërthyer në kritika pas humbjes në tokën spanjolle, duke i rënë në qafë hierarkisë së klubit për shkak të mungesës së përforcimeve të duhura gjatë afatit kalimtar veror. Ai shfaqi haptazi pakënaqësinë ndaj zyrtarëve të klubit, duke veçuar posaçërisht drejtorin teknik, Jason Wilcox. Vetëm një ditë pas kësaj interviste që bëri bujë të madhe, Martinez bëri një reagim zyrtar përmes një postimi në Instagram, ku argumentoi se deklaratat e tij erdhën si pasojë e gjaknxehtësisë dhe zhgënjimit të madh pas dështimit në fushën e gjelbër. “Pas gjithçkaje që është thënë për komentet e mia të djeshme, dua të ndaj disa mendime për atë që thashë dhe për mënyrën se si ndihem. Pas ndeshjes, fola nga zemërimi dhe zhgënjimi që nuk arritëm rezultatin që të gjithë e dëshironim. Ata që më njohin e dinë se si e jetoj futbollin, me pasion, përkushtim dhe një dëshirë të madhe për të fituar. Kur gjërat nuk shkojnë siç duam, kjo dhemb, veçanërisht kur përfaqëson një klub me historinë dhe madhështinë e Manchester Unitedit”, ka shkruar futbollisti nga Argjentina. Mbrojtësi shtoi se qëndrimet e tij reflektojnë ambicien e pandalur për ta parë skuadrën e Manchester Unitedit gjithmonë në garë për trofetë më prestigjioze. “Fjalët e mia pasqyrojnë atë që ndiej dhe sa shumë dëshiroj ta shoh këtë klub duke garuar për trofetë më të mëdhenj. Këto standarde të larta janë pjesë e mënyrës se si e shoh futbollin dhe përgjegjësisë që vjen me veshjen e kësaj fanelle. Kur flas për dëshirën për më shumë, e kam fjalën për ambicien që duhet ta kemi të gjithë si pjesë e këtij klubi. Të vazhdojmë të rritemi, të bëhemi më të fortë dhe të kemi gjithçka që na nevojitet për të garuar në nivelin më të lartë. Këto janë standarde që duhet t’ia kërkojmë vetes, duke filluar nga unë”, ka theksuar ai. Në vijim, lojtari pranoi se barra kryesore për ecurinë në fushë u takon vetë futbollistëve, duke u zotuar se do të sakrifikojë edhe më shumë për ta kthyer gjigantin anglez në majat e futbollit evropian. “E di se, para së gjithash, jemi ne lojtarët ata që duhet të japim rezultatet e duhura, dhe unë e vendos veten në krye të kësaj përgjegjësie. Duhet t’i kërkojmë edhe më shumë vetes dhe të punojmë së bashku për ta rikthyer Manchester Unitedin në majë. Besoj te bashkëlojtarët e mi, te trajneri ynë dhe te të gjithë ata që po punojnë për ta çuar klubin përpara. Jam i bindur se rruga përpara është të vazhdojmë të punojmë së bashku, me ambicie dhe përkushtim”, përfundoi Martinez. Në mbyllje të reagimit të tij, argjentinasi bëri të qartë se misioni i tij ka mbetur i pandryshuar që nga dita e parë: të triumfojë, të konkurrojë në skenat më të larta dhe të japë shpirtin në fushë për fanellën e Manchester Unitedit.