“Nuk na japin asnjë informacion”/ Drama e nënës nga Durrësi, kërkon djalin 16-vjeçar të shoqëruar nga policia

Ditën e sotme, vala e protestave është shtrirë edhe në qytete të tjera të vendit, ku në Durrës është regjistruar një rast prekës. Një nënë ka ngritur alarmin pasi ka humbur kontaktet me djalin e saj 16-vjeçar, i cili është shoqëruar nga efektivët e policisë teksa po kthehej në banesë. Sipas rrëfimit të saj, adoleshenti kishte përfunduar orët e mësimit dhe ishte nisur drejt shtëpisë në këmbë, për shkak të mungesës së transportit publik, moment kur është ndaluar nga autoritetet. “Djali im është vetëm 16 vjeç dhe ndjek vitin e dytë të shkollës së mesme. Ai u ndalua rrugës ndërsa po kthehej në këmbë, pasi nuk kishte autobusë”, tregon ajo e shqetësuar. Më tej, ajo thekson se institucionet ligjzbatuese nuk kanë dhënë asnjë shenjë përgjegjësie fillimisht, ndërsa edhe pas konfirmimit se i mituri ndodhet në komisariat, familjarëve u mohohet çdo e drejtë për të mësuar mbi gjendjen e tij shëndetësore. “Policia nuk na hapte as telefonin për të na konfirmuar nëse e kishin marrë ata. Unë i telefonoja djalit, por pa sukses. Pasi bashkëshorti u kthye nga puna dhe erdhi këtu, kuptuam se ai ndodhet në polici, por tani nuk na japin asnjë lloj informacioni se si është fëmija”, përfundon rrëfimin e saj nëna e 16-vjeçarit.