Njerëzorja mes tensionit në Tiranë: Përqafimi i fëmijës për efektivin në detyrë shkrin zemrat

Mes tensioneve dhe përleshjeve të ashpra që kanë përfshirë kryeqytetin, një moment prekës ka ndalur vrullin e protestës së sotme në Tiranë. Familjarët e një efektivi të Policisë kanë shkuar në vendin e tij të shërbimit për t'i sjellë ushqim, ndërsa pamjet e fëmijës së vogël duke e përqafuar ngrohtësisht babain e tij me uniformë kanë prekur zemrat e publikut. Ndërkohë, situata në terren vijon të jetë e tensionuar. Policia e Tiranës ka konfirmuar arrestimin e 55 personave dhe nisjen e procedimit penal për 98 të tjerë, pas akteve të dhunës të shënuara gjatë protestës së 14 tetorit. Bilanci i përplasjeve flet për 51 efektivë të lënduar, si dhe dëme të shumta materiale të shkaktuara në institucione shtetërore, biznese private, automjete dhe pronën publike. Sipas të dhënave zyrtare, në mesin e personave të proceduar penalisht janë edhe dy të mitur të moshës 15 dhe 17 vjeç. Tufa e protestuesve, ku disa prej tyre kanë qenë të maskuar, e nisi tubimin para Ministrisë së Arsimit në rrugën e Durrësit, për t'u shpërndarë më pas në disa akse kyçe të qytetit. Gjatë kësaj kohe, turma hodhi gurë, mjete të forta metalike, kapsolla dhe kokteje molotovi në drejtim të forcave të rendit, objekteve shtetërore dhe subjekteve private. Përveç lëndimit të 51 efektivëve, dëmet materiale llogariten të konsiderueshme. Godina e Ministrisë së Arsimit është dëmtuar rëndë në kangjella, mure dhe dritare, ndërsa shkatërrime janë konstatuar edhe në banka, institucione financiare dhe biznese. Për më tepër, janë dëmtuar fasada xhami, bankomate, kamera sigurie, semaforë, sinjalistikë dhe automjete të ndryshme. Një nga ngjarjet më kritike u regjistrua pranë Komisariatit të Policisë Nr. 2, ku protestuesit hynë brenda rrethimit dhe sulmuan me mjete të forta e lëndë piroteknike, duke thyer xhamat dhe portën hyrëse. Gjatë trazirave, një makinë e Policisë u dogj plotësisht me lëndë djegëse, ndërsa tri automjete të tjera të parkuara pësuan dëmtime nga goditjet me sende të forta. Këto arrestime dhe procedime vijnë si rezultat i hetimeve intensive të zhvilluara nën mbikëqyrjen e Prokurorisë së Tiranës, për të identifikuar të gjithë personat përgjegjës për dhunën e ushtruar. Kryeqyteti shqiptar tashmë prej tri ditësh po përballet me protesta dhe përplasje të dhunshme, të cilat nisën si kauza studentore dhe u përshkallëzuan në sulme të drejtpërdrejta ndaj Policisë dhe institucioneve. Nga vala e sulmeve, Ministria e Arsimit është vënë në shënjestër për të dytën herë, ku kati i parë është përfshirë nga flakët dhe dritaret janë shkatërruar tërësisht. Protestuesit kanë arritur të futen dhunshëm edhe brenda ambienteve të Ministrisë së Ekonomisë, Bashkisë së Tiranës, Kryesisë së Kuvendit, Gjykatës Kushtetuese dhe Komisariatit Nr. 2, ndërsa sulme janë regjistruar gjithashtu në drejtim të Kryeministrisë dhe Bankës së Shqipërisë, krahas dëmeve të shkaktuara në biznese e banka tregtare.