Protesta në Tiranë: 51 efektivë policie përfundojnë në spital, reagon ministri i Shëndetësisë

Ministri i Shëndetësisë i Shqipërisë, Ervin Demo, ka bërë të ditur se gjatë tubimit të zhvilluar sot në kryeqytet janë lënduar 51 punonjës të Policisë së Shtetit. Përmes një reagimi publik, kreu i shëndetësisë ka njoftuar se një pjesë e efektivëve të lënduar po trajtohen në Spitalin e Traumës, ku po u jepet ndihma e nevojshme mjekësore për të përballuar dëmtimet e marra në detyrë. Duke dënuar aktet e dhunës ndaj strukturave rendore, Demo ka nënvizuar se ndonëse liria e protestës është e drejtë kushtetuese, përdorimi i dhunës ndaj atyre që ruajnë sigurinë publike mbetet i pajustifikueshëm. “Pas çdo uniforme është një njeri. Një prind, një bir, një bijë, një familjar që ka dalë nga shtëpia për të përmbushur detyrën dhe për të garantuar sigurinë e qytetarëve”, ka shkruar ai.