Kaosi nga reshjet në Stamboll: Murat Boz dhe Demet Özdemir mbeten të bllokuar në studio dhe lëshojnë thirrjen për ndihmë

Metropoli turk, Stambolli, është përfshirë nga reshje të jashtëzakonshme shiu, të cilat kanë sjellë përmbytje të rënda në disa pjesë të qytetit. Përveç bllokimit të qarkullimit rrugor nga trafiku i rënduar, zona të tëra janë gjendur papritur nën pushtetin e vërshimeve të ujit. Në mesin e qytetarëve që kanë ngelur të bllokuar nga kjo situatë e jashtëzakonshme janë edhe dy emra shumë të njohur të skenës turke, këngëtari i famshëm Murat Boz dhe aktorja e njohur Demet Özdemir, të cilët ndodheshin për arsye pune brenda një studioje. Moti i keq ka goditur ambientet e "Phoenix Stüdyoları", të vendosura në zonën e Ayazağa-s, ku vërshimi i menjëhershëm i ujit ka depërtuar me forcë brenda ndërtesës, duke shkaktuar dëme dhe duke lënë kompleksin pa energji elektrike. Përmes profileve të tyre në rrjetet sociale, yjet e njohur kanë lëshuar menjëherë alarmin dhe një thirrje urgjente drejtuar strukturave të emergjencës për t'u vënë në ndihmë. "Jemi në zonën ku ndodhen Phoenix Stüdyoları në Ayazağa. Çdo gjë është nën ujë, studio po përmbytet dhe energjia elektrike është ndërprerë. Këtu jemi të bllokuar bashkë me qindra punonjës. Presim mbështetje urgjente nga autoritetet," ka shkruar këngëtari në mesazhin e tij. Me përshkallëzimin e situatës dhe rritjen e rrezikut, Boz ka publikuar një tjetër thirrje, ku ka vënë inë dukje se niveli i ujit kishte arritur shkallë kritike për sigurinë e personave brenda. "Tani po ngjitemi në pikën e fundit ku mund të ngjitemi… Ju lutem, na evakuoni me urgjencë. Këtu ka gra dhe të rinj," u shpreh ai, duke kërkuar angazhimin e menjëhershëm të autoriteteve për shpëtimin e tyre. Nga ana e saj, aktorja Demet Özdemir ka qenë gjithashtu aktive në rrjetet sociale, duke qetësuar disi ndjekësit dhe duke konfirmuar se po bashkëpunonin ngushtë me grupet e shpëtimit. Ajo ka paralajmëruar se rritja e pandalshme e nivelit të ujit paraqiste një rrezik real për jetën e të gjithë atyre që ishin strehuar brenda godinës së përmbytur. "Ju falënderoj shumë të gjithëve që keni shkruar e keni telefonuar. Jemi në kontakt me autoritetet dhe po presim të arrijnë te ne. Shpresojmë që pa humbur më shumë kohë, unë, kolegët e mi dhe të gjithë të tjerët që janë të bllokuar këtu të shpëtohemi. Uji po ngrihet, ky është ngutja jonë më e madhe për momentin," ka deklaruar aktorja. Në një postim vijues, ajo ka dhënë hollësi shtesë rreth gjendjes në terren, duke bërë me dije se po prisnin ndërhyrjen e ekipit të specializuar të kërkim-shpëtimit, AKUT. "Për ata që po pyesin (ose janë të shqetësuar): Po presim që AKUT-i (ekipi i kërkim-shpëtimit) të mbërrijë te ne. Kati i parë është thuajse përmbytur plotësisht. Ne jemi në katin e dytë, që është edhe kati i fundit," ka sqaruar ajo. Gjendja në "Phoenix Stüdyoları" në Ayazağa vazhdon të mbetet mjaft kritike, pasi kati i parë është pushtuar tërësisht nga uji, ndërsa të gjithë personat e bllokuar janë detyruar të ngjiten dhe të qëndrojnë në katin e dytë, që përbën edhe nivelin e fundit të kësaj ndërtese.