Mediat italiane: Ndryshimi i kompetencave për Urën e Ibrit dhe Manastirin e Deçanit po shihet qartë në terren

Portal i mirënjohur italian i specializuar për çështje mbrojtjeje, “Infodifesa.it”, i ka kushtuar vëmendje marrjes së komandës së misionit të KFOR-it nga gjenerali italian Roberto Vergori, duke vënë njoftuar se zhvendosja e përgjegjësisë për Urën e Ibrit te Policia e Kosovës është tashmë një realitet i prekshëm në terren. Sipas këtij burimi, ky transformim dëshmohet qartë te kalimi i autoritetit për urën kryesore të lumit Ibër në Mitrovicë te strukturat e Policisë së Kosovës, si dhe te angazhimi i saj i drejtpërdrejtë në skemën e sigurisë rreth Manastirit të Deçanit. “Tranzicioni tashmë është i dukshëm në terren: kalimi i përgjegjësisë për urën kryesore mbi Ibër, në Mitrovicë, te Policia e Kosovës, si dhe përfshirja e kësaj policie në dispozitivin e sigurisë përreth Manastirit të Deçanit”, nënvizohet në artikullin e mediumit italian. Në të njëjtin raportim rikujtohet edhe deklarata e paraardhësit të tij në krye të KFOR-it, gjeneralit turk Ozkan Ulutas, i cili para se të dorëzonte detyrën pati sqaruar se ky proces riorganizimi nuk nënkupton bartje të mandatit të misionit paqeruajtës te autoritetet vendase dhe as zbehje të pranisë së NATO-s. “Optimizimi nuk përbën transferim të mandatit të KFOR-it te Policia e Kosovës dhe as nuk përfaqëson tërheqje apo zvogëlim të angazhimit të NATO-s”, kishte deklaruar Ulutas gjatë mandatit të tij. Pavarësisht këtyre zhvillimeve dhe hapave drejt funksionalizimit, “Infodifesa” bën me dije se komanda e lartë e KFOR-it vazhdon ta cilësojë gjendjen e sigurisë në vend si të brishtë, me rrezik potencial për shpërthimin e tensioneve të reja, sidomos në pjesën veriore të territorit të Kosovës.