Tragjedi në Ferizaj: Gjendet pa shenja jete 46-vjeçari, familja e kishte shpallur të zhdukur

Një ngjarje e rëndë ka tronditur qytetin e Ferizajt, ku një 46-vjeçar është gjetur pa shenja jete në fshatin Rahovicë, vetëm pak kohë pasi familjarët kishin kërkuar ndihmë nga autoritetet për shkak të zhdukjes së tij. Alarmi për zhdukjen e viktimës ishte dhënë më 14 tetor, rreth orës 19:20, në Stacionin Policor të Ferizajt, çka vuri në lëvizje menjëherë strukturat e sigurisë. Gjatë operacionit të kërkim-shpëtimit në zonën e Parkut të Pishave, efektivët e policisë arritën të lokalisë veturën e tij të markës “Shkoda”, e cila mbante targa të huaja. Aksioni për gjetjen e tij përfshiu një angazhim të gjerë të njësive relevante policore, përfshirë ekipin e specializuar me qen K9, si dhe mbështetjen e Shoqatës për Kërkim dhe Shpëtim të Kosovës. Pas disa orësh kërkimesh intensive në terren, ekipet e angazhuara kanë bërë të mundur gjetjen e një trupi të pajetë, që dyshohet se i takon pikërisht personit të shpallur të zhdukur. Menjëherë pas marrjes së informatës, në vendngjarje kanë mbërritur njësitë përkatëse policore së bashku me ekipet mjekësore të emergjencës për të ndërmarrë veprimet e nevojshme procedurale. Lajmin për zhvillimet e fundit e ka konfirmuar zëdhënësi i Policisë së Kosovës për rajonin e Ferizajt, Kanun Veseli, i cili theksoi se po vazhdojnë hetimet për zbardhjen e plotë të rrethanave të ngjarjes, ndërsa detaje shtesë do të bëhen të ditura përmes raportit zyrtar.