Kërkesa urgjente e NATO-s: Ukraina ka nevojë për më shumë mburoja ajrore përballë furisë ruse

Sekretari i Përgjithshëm i NATO-s, Mark Rutte, u ka bërë thirrje shteteve aleate që të intensifikojnë dërgimin e ndihmave ushtarake për Ukrainën, duke vënë theksin te sistemet e mbrojtjes ajrore. Apeli vjen në një kohë kur Moska vazhdon të bombardojë kryeqytetin ukrainas me qindra dronë dhe raketa balistike në baza ditore. Sipas presidentit ukrainas Volodymyr Zelensky, sulmet shkatërruese ruse të mërkurës lanë mbi 600,000 qytetarë në mbarë vendin pa furnizim me energji elektrike. Duke folur gjatë një konference të përbashkët për shtyp në Talin me kryeministrin e Estonisë, Kristen Michal, kreu i NATO-s theksoi se me afrimin e stinës së ftohtë dhe sulmet e pandërprera të Kremlinit, mbështetja për mbrojtjen ajrore mbetet një domosdoshmëri absolute që nuk pret. Në kuadër të samitit të liderëve të Bashkimit Evropian, shefi i aleancës ushtarake pritet të zhvillojë një takim kokë më kokë me presidentin ukrainas në Bruksel ditën e enjte. Ky takim i rëndësishëm vjen në një periudhë tensionesh të theksuara ndërmjet Shteteve të Bashkuara dhe Kievit, lidhur me fushatën e sulmeve të Ukrainës ndaj infrastrukturës së naftës dhe derivateve në territorin rus. Administrata amerikane, e kryesuar nga presidenti Donald Trump, ka lëshuar paralajmërime për ndërprerjen e ndarjes së të dhënave kyçe të inteligjencës për sulmet me raketa balistike, si pasojë e goditjeve të vazhdueshme që Ukraina po i jep rafinerive ruse. Për Rusinë, eksportet e gazit dhe naftës përbëjnë burimin kryesor të të ardhurave financiare, të cilat ushqejnë dhe mbajnë gjallë makinën e luftës kundër shtetit ukrainas. Nga ana e tij, presidenti Zelensky ka theksuar rëndësinë jetike të informacionit të fshehtë, duke u shprehur se vendi i tij është gjendur i papërgatitur ndaj breshërisë së fundit të raketave në kryeqytet. Duke shkruar në platformën “X”, Zelensky u ankua se partnerët perëndimorë nuk ofruan asnjë paralajmërim të hershëm për sulmin me raketa balistike, dhe se sistemet vendase i pikasën ato vetëm në momentet e fundit para goditjes në Kiev. Presidenti ukrainas insistoi se inteligjenca e hershme mbi sulmet balistike është kritike për shpëtimin e jetëve njerëzore dhe parandalimin e viktimave civile. Ndërkohë, Uashingtoni ka lehtësuar masat sanksionuese ndaj naftës ruse, ndërsa presidenti Trump ka pohuar mundësinë e blerjes së stoqeve për të zbutur rritjen e shpejtë të çmimeve brenda tregut amerikan. Trump i ka bërë thirrje prerazi Kievit të ndalojë operacionet kundër impianteve energjetike ruse, duke e konsideruar këtë faktor – dhe jo situatën në Lindjen e Mesme – si shkakun kryesor të luhatjeve të çmimeve. I pyetur nga gazetarët për mundësinë e bllokimit të shkëmbimit të të dhënave nga SHBA-ja, Mark Rutte ka shmangur një pëjrgjigje direkte, duke iu referuar deklaratave të vetë presidentit amerikan. Rutte rikujtoi se Trump ka mohuar kategorikisht çdo ndërprerje të fluksit të informacioneve të inteligjencës, gjatë një prononcimi të shkurtër para mediave jashtë Shtëpisë së Bardhë. Të dy liderët, ai i NATO-s dhe ai estonez, vlerësuan se strategjia e Moskës synon të përçajë aleatët evropianë dhe të dobësojë solidaritetin ndërkombëtar ndaj Ukrainës. Kryeministri estonez, Kristen Michal, u shpreh se Rusia kërkon që Perëndimi të humbasë durimin dhe vullnetin për ta mbështetur Kievin, por shtoi se Talini do të vijojë me vendosmëri ndihmën e tij ushtarake.