Ministri italian i Mbrojtjes nga Prishtina: Prania jonë në Ballkan mbetet e palëkundur, mund të vendosim edhe radarë

Italia do të vijojë të mbështesë sigurinë në Ballkanin Perëndimor, pavarësisht mundësisë që KFOR-i të reduktojë trupat dhe operacionet e tij në territorin e Kosovës. Kështu ka deklaruar ministri italian i Mbrojtjes, Guido Crosetto. Këto deklarata ai i ka dhënë gjatë vizitës së tij në Prishtinë, ku ka marrë pjesë në ceremoninë e dorëzim-marrjes së detyrës për komandën e re të misionit paqeruajtës të KFOR-it. Duke e cilësuar Ballkanin si një shtyllë kyçe për sigurinë kombëtare të Italisë, ministri nuk e ka përjashtuar mundësinë e instalimit të sistemeve radarë në këtë zonë në të ardhmen e afërt, si masë parandaluese për të garantuar mbrojtjen e përbashkët ndaj rreziqeve të mundshme. “Nëse mendojmë se raketat që goditën aeroportet e Arabisë Saudite u prodhuan nga lëvizja Houthi – dhe jo nga ekspertë të fushës – duke arritur shpejtësi marramendëse prej 8.500 kilometrash në orë, bëhet e qartë natyra e rreziqeve që i kanosen shteteve në vitet e ardhshme”, u shpreh ai. Në këtë kuadër, Crosetto nënvizoi domosdoshmërinë e bashkëpunimit të ngushtë dhe ruajtjes së pikave strategjike në shtetet mike fqinje, me synim ndërtimin e një mburoje të unifikuar mbrojtëse ndaj sfidave të sigurisë globale.