Tensione dhe zjarr para Kryeministrisë: Protestuesit thyejnë rrethimin, policia përgjigjet me gaz lotsjellës

Situata para godinës së qeverisë ka marrë një kthesë dramatike, pasi protestuesit kanë arritur të futen brenda perimetrit të sigurisë së Kryeministrisë. Gjatë përplasjeve, pemët e oborrit janë përfshirë nga flakë të fuqishme, duke krijuar një vatër të rrezikshme zjarri që ka marrë përmasa të mëdha. Përballë kësaj situate të tensionuar, forcat e rendit kanë ndërhyrë fuqishëm duke hedhur sasi të konsiderueshme gazit lotsjellës në drejtim të turmës, në përpjekje e sipër për të sprapsur demonstruesit dhe për të rikthyer kontrollin në zonë. Përshkallëzimi i protestës erdhi pas përleshjeve të dhunshme në Bulevardin “Dëshmorët e Kombit”, ku pjesëmarrësit në protestë hodhën gurë dhe sende të forta drejt punonjësve të policisë, të cilët u përgjigjën menjëherë duke përdorur gaz lotsjellës dhe automjete me ujë me presion. Në kuadër të përpjekjeve për të bllokuar lëvizjen e mjeteve policore, më herët demonstruesit kishin vendosur në mes të bulevardit vazo të mëdha lulesh, barriera metalike dhe pengesa të tjera fizike, duke vështirësuar qarkullimin në zonë. Pavarësisht numrit të lartë të forcave të sigurisë dhe mjeteve të shpërndarjes së turmës, një grup protestuesish arriti të çajë kordonin dhe të hyjë brenda zonës së rrethuar të institucionit ekzekutiv, duke rritur ndjeshëm nivelin e alarmit. Deri më tani, autoritetet nuk kanë dhënë ende informacione zyrtare mbi shkallën e dëmeve materiale të shkaktuara nga zjarri dhe as për ndonjë rast të mundshëm personash të lënduar gjatë këtyre incidenteve.