Rasti i kanosjes së gazetarit Mehmetaj: Gani Geci s'ka frikë nga arratisja, flet avokati dhe gjykata jep detajet

Ish-deputeti Gani Geci, i cili ndodhet nën masën e paraburgimit prej një muaji për shkak të dyshimeve për kanosjen e gazetarit Lirim Mehmetaj, ka mohuar çdo mundësi arratisjeje, duke theksuar se i vetmi dëshmitar i këtij incidenti është babai i vetë gazetarit. Këto detaje janë bërë të ditura përmes dokumentit të plotë të Gjykatës Themelore në Prishtinë, ku pasqyrohet se Geci ka insistuar se qëllimi i tij i vetëm ka qenë mbrojtja e familjes dhe jo frikësimi i askujt. Gjatë seancës dëgjimore, para gjyqtarit të procedurës paraprake Albert Haliti, Geci ka përmendur se organi i akuzës është fokusuar ekskluzivisht te provat që e rëndojnë pozitën e jo te ato shfajësuese. Ai ka shtuar se duke qenë se dëshmitar i ngjarjes është vetëm babai i të dëmtuarit, nuk ekziston asnjë mundësi që ai të ndikojë te dëshmitarët. Nga ana e tij, prokurori i rastit Blerim Igrishta ka kërkuar që masa e paraburgimit të mbetet në fuqi, duke qëndruar pranë pretendimeve të ngritura në kërkesë. Në krahun tjetër, mbrojtësi i ish-deputetit, avokati Besnik Berisha, ka hedhur poshtë pretendimet për paraburgim, duke vlerësuar se mungojnë kushtet ligjore për një masë të tillë. Sipas avokatit, veprimet e klientit të tij nuk përbëjnë kanosje, por përfaqësojnë një reagim për mbrojtjen e familjes, pasi nipi i tij, deputeti Fatos Geci, ishte vënë në shënjestër nga Mehmetaj përmes lidhjeve të pretenduara me Beogradin. Berisha gjithashtu ka argumentuar se nuk ka rrezik për prishje të provave, pasi kamerat kanë qenë jofunksionale dhe nuk ka dëshmitarë të tjerë okularë. Në vendimin e Gjykatës Themelore thuhet se ekziston një dyshim i bazuar mirë se i dyshuari ka kryer veprën penale të kanosjes, mbështetur në provat e dorëzuara. Sipas dosjes, Mehmetaj ka deklaruar se Geci i është drejtuar me fjalët se nëse nuk hiqet ose ndryshohet postimi, do të ketë pasoja fatale. Gjykata ka evidentuar gjithashtu se Geci kishte përdorur rrjetin social TikTok për të njoftuar praninë e tij jashtë studios së një emisioni ku ishte i ftuar gazetari, duke e pritur atë për rreth dy orë. Bazuar në komunikimet e siguruara në Facebook dhe deklarimet e vetë palëve, Gjykata ka konfirmuar se mes tyre ka pasur shkëmbime mesazhesh lidhur me postimin për Fatos Gecin, takime në zyrat e “VOX Kosova”, si dhe një bashkëbisedim të dyshuarit me babain e gazetarit. Sipas gjykatës, veprimet e ndërmarra dhe publikimet në rrjetet sociale dëshmojnë lëvizjet e Gecit drejt ambienteve televizive.