Më në fund marrin fund pritjet: Ekzekutohen pagat për punonjësit teknikë të shkollave në kryeqytet

Drejtoria e Financave e Komunës së Prishtinës ka zyrtarizuar lajmin se gjatë ditës së sotme, më 14 tetor, janë derdhur pagat për stafin teknik të institucioneve arsimore në kryeqytet. Ky zhvillim ka erdhur përmes një konfirmimi zyrtar nga ky dikaster komunal, pas interesimit të gazetës sonë rreth gjendjes së krijuar nga protesta dhe greva e punonjësve teknikë nëpër shkolla. Sipas komunikatës zyrtare, me kryerjen e këtyre pagesave merr zgjidhje kërkesa kryesore që kishte shkaktuar shqetësim dhe paqartësi në sektorin e shërbimeve shkollore. Ndërkohë, sa i takon hapave të mëtejshëm lidhur me fatin e grevës, nga Komuna e Prishtinës u theksua se vendimi për vazhdimin apo ndalimin e saj mbetet në dorë të sindikalistëve dhe përfaqësuesve të punëtorëve.