Fadil Geci pas dyerve të gjykatës: Ne jemi familje shtetformuese, luftuam për Kushtetutën

Teksa në Gjykatën Themelore të Prishtinës po zhvillohet seanca dëgjimore ndaj ish-deputetit Gani Geci, i cili dyshohet për kanosje ndaj gazetarit Lirim Mehmetaj, vëllai i tij, Fadil Geci, ka dhënë një deklaratë për mediat nga oborri i Pallatit të Drejtësisë. Gjatë prononcimit para gazetarëve të pranishëm, Fadil Geci ka theksuar se familja e tyre ka dhënë kontribut të çmuar në ndërtimin e shtetit dhe se nuk ka qenë kurrë përfituese prej tij. Ai u shpreh se angazhimi i tyre ndër vite ka qenë i orientuar drejt mbrojtjes së rendit dhe ligjit. "Jemi familje shtetformuese, nuk jemi shtetpërfituese. Krejt luftën tonë prej fillimit e kemi bërë për shtetin tonë, për ta mbrojtur Kushtetutën e Kaçanikut, dhe për ata jemi këtu sot, në atë drejtim do të punojmë deri të vdesim", u shpreh Geci. Në përmbyllje të fjalës së tij, ai ritheksoi përkushtimin e pandalur të familjes ndaj vendit, duke shtuar se të gjitha sfidat dhe sakrificat e kaluara kanë pasur vetëm një qëllim suprem: "Krejt vuajtjet tona i kemi bërë për shtet. E duam shtetin".