Bashkëpunim ndërkombëtar: Ekstradohen nga Gjermania dhe Zvicra dy persona të shpallur në kërkim ndërkombëtar

Operacione të suksesshme të Policisë së Kosovës, përmes Drejtorisë për Bashkëpunim Ndërkombëtar Policor dhe në koordinim të ngushtë me institucionet e drejtësisë, kanë çuar në sjelljen në vend të dy shtetasve kosovarë që ishin të kërkuar me urdhërarrest ndërkombëtar nga INTERPOL-i. Ekstradimet janë kryer gjatë datave 13 dhe 14 tetor 2026, pas arrestimit të tyre nga autoritetet gjermane dhe zvicerane. Më 13 tetor 2026, nga Gjermania është sjellë në Kosovë një shtetase kosovare, e cila ishte nën llupën e drejtësisë për veprën penale të blerjes, posedimit, shpërndarjes dhe shitjes së paautorizuar të narkotikëve, substancave psikotrope dhe analoge. Menjëherë pas mbërritjes, e dyshuara i është dorëzuar strukturave policore të rajonit të Pejës për të vijuar me hapat e mëtutjeshëm proceduralë ligjorë. Ndërkaq, më 14 tetor 2026, një tjetër operacion ka rezultuar me ekstradimin nga Zvicra të një shtetasi kosovar, i kërkuar për veprën penale të grabitjes. Me të mbërritur në vend, personi në fjalë i është dorëzuar njësitit përkatës policor në rajonin e Gjilanit, për të vazhduar procedurat e parapara ligjore. Këto procedura të suksesshme ekstradimi janë finalizuar në përputhje të plotë me legjislacionin në fuqi, duke dëshmuar efikasitetin e bashkëpunimit ndërkombëtar ndërmjet autoriteteve të Republikës së Kosovës dhe shteteve partnerë nga janë sjellë të dyshuarit.