Përurohet kënga “Ne nuk harrojmë”: Një homazh madhështor për dëshmorët dhe thirrje për drejtësi

Në kuadër të ditës kushtuar kujtimit të krimeve dhe gjenocidit të ndodhur në Abri të Epërme, Qendra “Gjenocidit në Kosovë-Plagë e Hapur” ka organizuar promovimin e këngës së re “Ne nuk harrojmë”, e cila i dedikohet të gjithë martirëve dhe viktimave të luftës çlirimtare. Projekti artistik vjen me kompozim të Edmond Zhulalit dhe tekst të shkruar nga Fran Laska, ndërsa interpretimi i fuqishëm i u besua një plejade artistësh të njohur, ku bëjnë pjesë Enkelejda Arifi, Ilir Shaqiri, Kastriot Tusha, Nikollë Nikprelaj dhe Selami Kolonja. Ngjarja solemne u prit në mjediset e sallës “AMC Hall” në qytetin e Obiliqit. Për t'i dhënë rëndësi dhe peshë këtij manifestimi, nga Danimarka kishin udhëtuar personalitete të shquara, përfshirë intelektualin danez Niels Henrik Hooge – ish-luftëtar vullnetar i Ushtrisë Çlirimtare të Kosovës dhe i dekoruar nga Presidenca për kontributin e tij – si dhe historiani e eksperti i Ballkanit, Tue Magnussen. Po ashtu, e pranishme ishte edhe shkrimtarja nga Galicia e Spanjës, autorja e veprës “Mirupafshim në Kosovë”. Në mesin e miqve ndërkombëtarë të pranishëm në këtë ngjarje ishte edhe gazetari i njohur britanez, Vaughan Smith, i cili mbahet mend për dokumentimin me kamera të masakrës dhe gjenocidit në lagjen e familjes Jashari në Prekaz. Përveç qëllimit parësor për të nderuar kujtimin e të rënëve, ky aktivitet kulturor dhe përkujtimor shërbeu edhe si një thirrje e fuqishme për vënien e drejtësisë në vend, duke kërkuar ndëshkimin meritor të autorëve të gjenocidit në Kosovë dhe lirimin e menjëhershëm të luftëtarëve të lirisë.