Nata e ëndrrave në 'San Siro': Tifozi i Milanit, Nicolo Tresoldi, kthehet në makthin e Interit me një 'tripletë' historike

Nicolo Tresoldi ka kaluar një mbrëmje të paharrueshme në stadiumin 'San Siro', duke shënuar tre gola në triumfin dramatik 4-3 të Club Brugge ndaj Interit, në kuadër të Ligës së Kampionëve. Sulmuesi 22-vjeçar ishte figura qendrore e njërës prej befasisë më të mëdha të mbrëmjes, duke realizuar një 'hat-trick' ndaj gjigantit italian dhe duke i siguruar skuadrës belge një fitore spektakolare. Pas përfundimit të përballjes, Tresoldi e cilësoi këtë paraqitje si një ëndërr të realizuar, duke shtuar se realizimi i tre golave në 'San Siro' ishte një ndjesi e papërshkrueshme me fjalë. “Ishte e pabesueshme, e papërshkrueshme. Kisha ëndërruar kaq shumë herë për një natë si kjo, por të shënoj tre gola dhe të fitoj këtu në San Siro është e papërshkrueshme me fjalë. E gjithë familja dhe miqtë e mi ishin gjithashtu në tribuna, është thjesht fantastike”, deklaroi ai për televizionin italian. Për 22-vjeçarin, kjo fitore kishte një peshë specifike, duke qenë se ka lindur në Itali dhe është tifoz i flaktë i Milanit, armikut të përbetuar të Interit. Ai tregoi se kishte marrë një numër të madh mesazhesh nga mbështetësit kuqezi para takimit, të cilët i kishin kërkuar të tundte rrjetën dhe t'i jepte fitoren Club Brugge. “Jam i lumtur para së gjithash që Club Brugge fitoi, për të gjithë futbollin belg, por duhet ta pranoj se ishte pak si një derbi për mua. Është shumë!”, tha sulmuesi. Krahas shkëlqimit në fushë, Tresoldi foli edhe rreth së ardhmes së tij në arenën ndërkombëtare, pasi ende nuk ka marrë një vendim përfundimtar nëse do të mbrojë ngjyrat e Italisë apo të Gjermanisë në nivelin e përfaqësueses A. Ai ka paraqitur Gjermaninë në grupmoshat e reja, ndërkohë që lidhjet me shtetin italian mbeten tejet të fuqishme, falë vendit të lindjes dhe zotërimit të përkryer të gjuhës italiane. “Fola me Klopp, Mancini, federatat e të dy vendeve, ata e kuptuan se si i shoh gjërat. Unë gjithmonë flas italisht në shtëpi, kam lindur edhe në Itali. Do ta shohim. Po e shijoj veten me ekipin e Gjermanisë U-21, kemi një Kampionat Evropian për të luajtur, është një trofe që babai im e fitoi me Italinë, kështu që është një objektiv për mua. Pastaj do ta shohim se çfarë do të ndodhë”, u shpreh ai. Gjithashtu, Tresoldi zbuloi edhe skemën taktike që Club Brugge kishte përgatitur për ta neutralizuar Interin, duke theksuar se ekipi belg kishte për qëllim ushtrimin e presionit të lartë dhe ndëshkimin e çdo lloj pasigurie nga kundërshtari. “E dinim që Interi është skuadra më e mirë në Itali dhe një nga më të mirat në botë. Donim t'i bënim presion lart, sepse u pëlqen të kalojnë bllokime të ulëta, dhe ne donim të shfrytëzonim sa më shumë çdo gabim, të ishim seriozë para portës”, deklaroi sulmuesi. Në fund, ai veçoi se shpejtësia dhe përgatitja fizike e përbërjes së Club Brugge kishin dhënë një kontribut thelbësor në këtë sukses, pa harruar të përmendë edhe fatin në momentin kur vendasit goditën traversën. “Ne jemi të shpejtë dhe të ri, por gjithashtu i shfrytëzuam në maksimum rastet tona dhe patëm pak fat kur ata goditën traversën. Mund të shihej se po e shijonim lojën dhe në pjesën e dytë e rritëm nivelin tonë”, përfundoi Tresoldi. Me këtë paraqitje brilante, sulmuesi i Club Brugge ka fituar vëmendjen e opinionit sportiv, jo vetëm për shkak të talentit të shfaqur në fushë, por edhe për shkak të enigmës rreth kombëtares që do të përfaqësojë në të ardhmen.