Mbështetje për ish-krerët e UÇK-së: Qeveria krijon grupin punues nën drejtimin e Glauk Konjufcës

Ekzekutivi i Republikës së Kosovës ka ndërmarrë një hap zyrtar duke themeluar një grup të posaçëm punues, i cili do të merret me trajtimin e çështjes së ish-krerëve të Ushtrisë Çlirimtare të Kosovës në shkallën e dytë të gjykimit, në Gjykatën Speciale. Gjatë mbledhjes së kabinetit qeveritar, kryeministri Albin Kurti bëri të ditur se ky mekanizëm do të përfshijë përfaqësim të gjerë nga institucionet shtetërore dhe Kuvendi, me synimin parësor koordinimin e ndihmës dhe mbështetjes institucionale për ish-luftëtarët. Kreu i ekzekutivit njoftoi gjithashtu se ky trup punues do të udhëhiqet nga kryetari i Kuvendit të Kosovës, Glauk Konjufca. "Me këtë vendim po e konkretizojmë zotimin tonë që, me mjetet që kemi në dispozicion, të angazhohemi për drejtësi dhe për mbrojtjen e së vërtetës historike të luftës sonë çlirimtare", theksoi Kurti gjatë fjalës së tij. Në anën tjetër, pas përfundimit të mbledhjes, ministri Andin Hoti u deklarua për mediat, duke ritheksuar se qeveria do t'i vërë në lëvizje të gjitha kapacitetet e saj për të mbrojtur vlerat e luftës çlirimtare. "Ne sapo kemi themeluar grupin punues për hartimin e strategjisë shtetërore… afatet kohore se kur do të realizohet strategjia, varen prej shumë faktorëve. Për ne është shumë e rëndësishme që të fillojë menjëherë dhe të trajtohet në radhët e para, dhe të evitohen gabimet. Unë besoj që shumë shpejt se do të krijohet një strategji e tillë, por nuk mund të them afatin se kur do të krijohet", u shpreh Hoti.