Trazira në Old Trafford: E ardhmja e Michael Carrick vihet në pikëpyetje pas krizës te Manchester United

Vala e problemeve te Manchester United duket se nuk ka të ndalur. Humbja e fundit e pësuar nga Atletico Madridi, kritikat e hapura të mbrojtësit Lisandro Martinez ndaj menaxhmentit dhe atmosfera e tensionuar brenda dhomave të zhveshjes kanë rritur ndjeshëm pikëpyetjet rreth fatit të trajnerit Michael Carrick në krye të skuadrës. Në qoftë se drejtuesit e klubit do të marrin vendim për një shkarkim të mundshëm, emri i italianit Antonio Conte qarkullon fuqishëm si një ndër kandidatët kryesorë për të marrë drejtimin e “Djajve të Kuq”. Në një zhvillim tjetër, mbrojtësi argjentinas Lisandro Martinez, i njohur ndryshe si “Licha”, doli publikisht në mbrojtje të shefit të stolin, duke vënë theksin te mungesa e mbështetjes institucionale dhe merkatua e dështuar e verës. “A mund të kishte bërë më mirë Carrick? Nuk besoj. Ai e bëri më të mirën. Prisja më shumë investime gjatë verës”, theksoi Martinez pas disfatës 2-0 përballë Atletico Madridit. Futbollisti argjentinas kërkoi llogaridhënie më të madhe nga strukturat drejtuese të klubit. “Pres më shumë nga drejtori ynë teknik. Nëse nuk ndryshojmë, sezoni i ardhshëm do të jetë një problem i madh. Vazhdojmë të ndryshojmë trajnerët, por çfarë ndodh me sektorët e tjerë? Është e lehtë të flasim gjithmonë për trajnerin dhe lojtarët, por a nuk duhet të shikojmë edhe pjesët e tjera të klubit?”, shtoi ai. Ndonëse kupola drejtuese e Manchester Unitedit po analizon me kujdes rrethanat aktuale, ende nuk është marrë ndonjë vendim i prerë lidhur me pozitat e Carrickut. Struktura udhëheqëse nën pronësinë e Sir Jim Ratcliffe parapëlqen të shmangë turbulencat e reja dhe ndryshimet e shpeshta në stolin teknik, mirëpo seria e rezultateve negative dhe pakënaqësitë e akumuluara po e bëjnë këtë skenar pothuajse të pashmangshëm. Për momentin, Unitedi numëron vetëm gjashtë pikë nga gjashtë sfidat e para në kampionat, duke lundruar në vendin e 13-të të renditjes në Premier League. Në këtë klimë të rënduar, opsioni i Antonio Contes po fiton gjithnjë e më shumë terren. Strategu italian, i cili ka eksperiencë të mëparshme në futbollin anglez në krye të Chelsean dhe Tottenhamit, shfaqet i hapur për të marrë drejtimin e skuadrës nga Old Trafford edhe gjatë këtij sezoni. Tashmë, fati i Michael Carrick mbetet i lidhur ngushtë me paraqitjet dhe rezultatet në ndeshjet e ardhshme, ndërsa Manchester Unitedi vazhdon të lundrojë në ujëra të trazuara në përpjekje e sipër për të rimarrë vendin e merituar në elitën e futbollit anglez.