Kthimi i fruthit në Kosovë, ministri Vitia thirrje urgjente prindërve: Vaksinimi është mburoja e vetme

Ministri i Shëndetësisë, Arben Vitia, u është drejtuar qytetarëve përmes një mesazhi video, duke kërkuar reagim të menjëhershëm nga prindërit për imunizimin e fëmijëve kundër fruthit. Duke vënë theksin te rreziqet që mbart kjo sëmundje, ai ka apeluar për një mobilizim kolektiv për të frenuar përhapjen e saj. Në fjalën e tij, Vitia ka sqaruar se fruthi nuk është një sëmundje e lehtë, pasi mund të shkaktojë komplikime serioze shëndetësore. Sipas tij, situata aktuale kërkon përgjegjësi të lartë qytetare dhe institucionale, me qëllim që të parandalohet një përhapje më e gjerë në popullatë. “Të dashur prindër, fruthi është rikthyer në vendin tonë. Kjo situatë kërkon vëmendjen, përgjegjësinë dhe angazhimin e përbashkët të të gjithëve për të parandaluar përhapjen e mëtejshme të kësaj sëmundjeje. Ajo është lehtësisht e parandalueshme përmes vaksinimit të rregullt, praktikë kjo që është ndjekur ndër breza. Vaksinimi mbetet mënyra më e sigurt dhe më efektive për mbrojtjen nga fruthi. Prandaj, ju lutem që të kontrolloni statusin e vaksinimit të fëmijëve tuaj dhe të siguroheni që ata të jenë të vaksinuar”, ka deklaruar ministri Vitia.