Brukseli kritikon ashpër Beogradin: Pse Milan Radoiçiq mbetet i lirë?

Bashkimi Evropian ka shprehur pakënaqësinë e tij të thellë ndaj autoriteteve serbe, për shkak të dështimit të vazhdueshëm për të ndaluar Milan Radoiçiqin, i cili dyshohet si organizatori kryesor i sulmit në Banjskë. Reagimi vjen pas publikimit të pamjeve ku Radoiçiq shfaqej në një tubim elektoral në Serbi. Christian Wiegand, zëdhënës i BE-së, përmes një deklarate zyrtare, ka theksuar se Brukseli mbetet i zhgënjyer nga fakti se Serbia nuk ka ndërmarrë asnjë veprim konkret për arrestimin dhe ndjekjen penale të personave të përfshirë në ngjarjet e dhunshme në Banjskë, të cilët ndodhen brenda territorit serb. Kujtojmë se pak ditë më parë, Milan Radoiçiq është fotografuar në Kragujevc, në prani të djalit të presidentit Aleksandar Vuçiq, gjatë një manifestimi parazgjedhor të organizuar nga Partia Përparimtare Serbe (SNS). Kjo ngjarje ka ngjallur reagime të ashpra ndërkombëtare, duke vënë në pikëpyetje vullnetin e Beogradit për drejtësi. Në mesazhin e tij, Wiegand ka rikujtuar se kërkesa e BE-së për vënien para përgjegjësisë të autorëve të këtij sulmi është e përsëritur dhe e qartë. Sipas tij, Serbia ka detyrimin që të bashkëpunojë nëpërmjet mekanizmave të ndihmës juridike reciproke. Në përfundim, zëdhënësi evropian ka kërkuar që kjo çështje, e cila ka mbetur e zvarritur për një kohë të gjatë, të trajtohet me urgjencë maksimale nga ana e Beogradit, duke nënvizuar se vonesat e mëtejshme janë të papranueshme.