Zvarritja e punimeve në stadiumin e Gjilanit alarmon deputetët, kërkohet inspektim nga afër

Çështja e vonesave dhe zvarritjes së punimeve në stadiumin e qytetit të Gjilanit ka përfunduar në fokusin e diskutimeve të Komisionit për Kulturë, Turizëm dhe Sport, ku është kërkuar një angazhim më i madh institucional për të zhbllokuar situatën. Gjatë mbledhjes së këtij komisioni, deputetja e Lëvizjes Vetëvendosje dhe njkohësisht anëtare e tij, Adriana Matoshi, ka paraqitur një propozim konkret që trupa parlamentare të ndërmarrë një vizitë zyrtare në terren, me qëllim që të shihet nga afër gjendja aktuale dhe ritmi i ngadaltë i ndërtimeve gjatë muajve të fundit. "Unë kisha propozuar të shkojmë te stadiumi i Gjilanit. Pasi veç kanë filluar punimet me sa di unë, por e di që është problemi te dinamika e punimeve, ka stagnuar muajt e fundit. Ndoshta është mirë të bisedojmë edhe me ministrin pasi jemi afër Lojërave Mesdhetare, të shkojmë dhe të shohim ku janë problemet", ka deklaruar Matoshi. Në lidhje me këtë propozim, kryetari i komisionit, Nezir Kraki, ka theksuar se një vizitë e tillë në stadium është e realizueshme, mirëpo për sqarimin e detajeve teknike dhe ecurinë reale të projektit, përgjigjet më të plota pritet t'i kërkohen drejtpërdrejt ministrit kompetent, i cili do të ftohet zyrtarisht në një nga mbledhjet e ardhshme të komisionit. "Për avancimet teknikisht në stadium, është mirë me pas mundësi të shkojmë, por për teknikalitetet e ndërtimeve dhe avancimeve të projekteve me siguri ministrin tash që e kemi paraparë ta ftojmë, kemi rastin t’ia shtrojmë pyetjet konkretisht. Nuk kemi përgjigje konkrete e precize", u shpreh Kraki. Projekti i stadiumit të qytetit në Gjilan vazhdon të përballet me ngecje të dukshme në dinamikën e realizimit. Debati i fundit parlamentar dëshmon nevojën urgjente për transparencë dhe mbikëqyrje më të rreptë institucionale, ndërsa deputetët mbeten të vendosur për të kërkuar llogaridhënie nga ekzekutivi mbi arsyet e këtij bllokimi.