Çeferin zbulon presionin publik në Kroaci: Më kërkuan dy herë të ndaloj Infantinon

Presidenti i UEFA-s, Aleksander Çeferin, i cili mban këtë post që nga viti 2016, ka konfirmuar zyrtarisht synimin e tij për të kandiduar për një mandat të ri në krye të futbollit evropian. Në një rrëfim të hapur për gazetën sllovene “Delo”, ai ka ndarë detaje mbi marrëdhëniet e tij të acaruara me kreun e FIFA-s, Gianni Infantino, duke sjellë në vëmendje dy episode të pazakonta që i kanë ndodhur gjatë qëndrimit të tij në Kroaci. Sipas Çeferinit, pakënaqësia ndaj Infantinos nuk kufizohet vetëm brenda qarqeve sportive, por është përhapur edhe te njerëzit e thjeshtë. Ai përshkroi një situatë të ndodhur në një restorant, ku pronari i lokalit e kishte njohur dhe i kishte ofruar drekën falas me një kusht të vetëm: “Nuk keni nevojë të paguani, vetëm ju lutem ndalojeni këtë Infantinon”, i kishte thënë ai. Një tjetër rast, edhe më i papritur, ndodhi në pikën kufitare. Çeferin rrëfeu se në momentin që ia dorëzoi pasaportën policit kufitar për kontroll, ky i fundit e pyeti drejtpërdrejt: “A do ta ndaloni këtë njeri?”. Presidenti i UEFA-s e cilësoi këtë si një përvojë unike dhe tregues të një pakënaqësie të gjerë, duke shtuar se bëhet fjalë për një çështje serioze që kërkon debat, të cilin Infantino refuzon ta zhvillojë, duke preferuar të veprojë në mënyrë të njëanshme. Lidhur me vendimin për të kërkuar një mandat të ri, Çeferin sqaroi se ambicia e tij nuk është e motivuar nga rivaliteti personal me Infantinon, por nga nevoja për të garantuar stabilitet dhe unitet në futbollin evropian, i cili, sipas tij, po sfidohet nga presione të ndryshme të jashtme. Në fund, kreu i UEFA-s pranoi se komunikimi me homologun e tij në FIFA është inekzistent. Ai theksoi se pas lajmeve për përpjekjet për përfshirjen e investitorëve privatë, Infantino nuk ka ndërmarrë asnjë iniciativë për ta kontaktuar. “Nuk kam asnjë raport me Gianni Infantinon. Ai nuk më ka telefonuar, nuk më ka shkruar dhe nuk ka kërkuar asnjë diskutim. Në thelb, marrëdhënia mes presidentit të UEFA-s dhe atij të FIFA-s nuk ekziston”, përfundoi Çeferin.