Alarmi i INSTAT për rrugët: Rritje e viktimave nga aksidentet, faktor kryesor papërgjegjshmëria e shoferëve

Instituti i Statistikave (INSTAT) ka bërë publike të dhënat e një botimi të posaçëm kushtuar treguesve të sigurisë rrugore për vitin 2025 në Shqipëri, duke ngritur shqetësimin për përkeqësimin e situatës në akset nacionale dhe urbane. Sipas raportit zyrtar, gjatë vitit 2025 janë shënuar gjithsej 1 mijë e 375 aksidente rrugore, ku janë përfshirë 1 mijë e 913 persona. Krahasuar me periudhën e njëjtë të vitit 2024, statistikat tregojnë një rritje prej 14.3 për qind të numrit të jetëve të humbura në fatkeqësi trafiku. Analiza e shkaqeve tregon se faktori njerëzor mbetet përgjegjësi kryesor për këto ngjarje tragjike. Konkretisht, 87,9 për qind e aksidenteve kanë ndodhur për faj të drejtuesve të automjeteve, ndërsa vetëm 12,1 për qind e rasteve i atribuohen sjelljes së gabuar të këmbësorëve. Në vështrim të thelluar të profilit të shkaktarëve, INSTAT vëren se 49,2 për qind e aksidenteve janë provokuar nga shoferë me mbi 9 vite përvojë në drejtimin e mjetit, ndërsa ata që zotërojnë leje drejtimi nga 0 deri në 3 vite mbajnë përgjegjësi për 16,3 për qind të rasteve. Të dhënat demografike dëshmojnë se gjinitë nuk preken njëlloj nga ky fenomen. Gjatë tri viteve të fundit, meshkujt përbëjnë 68,7 për qind të totalit të personave të përfshirë në aksidente, qofshin të vdekur apo të plagosur. Në aspektin e grupmoshave, statistikat tregojnë se shoferët e moshës 25–34 vjeç mbajnë primatin për numrin më të lartë të aksidenteve të shkaktuara përgjatë vitit 2025. Brenda këtij segmenti demografik të aksidentuarish, 70 për qind i takojnë gjinisë mashkullore dhe 30 për qind asaj femërore.