Vazhdimësi në “Signal Iduna Park”: Borussia Dortmund beson afatgjatë te trajneri Niko Kovač

Përfaqësuesit e Borussia Dortmundit kanë vendosur të vijojnë bashkëpunimin me Niko Kovač, duke i besuar atij drejtimin e skuadrës për vitet e ardhshme përmes një marrëveshjeje të re. Institucioni gjerman ka zyrtarizuar vazhdimin e kontratës me teknikun kroat, i cili ka firmosur një akord që e mban të lidhur me klubin deri më 30 qershor 2029. Ky hap dëshmon besimin e plotë të strukturës drejtuese te 54-vjeçari, i cili mori frerët e skuadrës në pranverën e vitit 2025, periudhë kur BVB po kalonte një moment delikat dhe pozicionohej në vendin e njëmbëdhjetë në Bundesliga. Kovač e ringriti me sukses ekipin, duke siguruar pjesëmarrjen në Champions League në aktin e fundit të edicionit 2024/25 dhe duke e ngjitur më pas në vendin e dytë të renditjes me 73 pikë të grumbulluara. “Kemi qenë në rrugën e duhur me Niko Kovač që kur ai mori drejtimin. Ai e ka zhvilluar vazhdimisht ekipin dhe gëzon vlerësim të madh brenda klubit. Kjo zgjatje kontrate është një sinjal i qartë vazhdimësie dhe stabiliteti,” deklaroi drejtori sportiv Lars Ricken. Nga ana e tij, Drejtori Ekzekutiv Carsten Cramer vuri në dukje harmoninë mes filozofisë së trajnerit dhe identitetit verdhezi: “Niko identifikohet fuqimisht me BVB-në dhe përshtatet në mënyrë të përkryer me klubin tonë.” Të dhënat statistikore flesin qartë për punën e bërë nga kroati: në 53 sfida të kampionatit gjerman në krye të Dortmundit, ai ka arritur të sigurojë 114 pikë, duke regjistruar një mesatare prej 2.15 pikësh për takim, çka përbën rekord historik për një trajner në stolin e kësaj skuadre. “Kemi përcaktuar një kurs të qartë për të ardhmen dhe kemi hedhur baza të rëndësishme për rritje. Nuk duam të kënaqemi me rezultatet e arritura, por të vazhdojmë të përmirësohemi çdo ditë,” u shpreh Kovač pas zyrtarizimit të marrëveshjes së re.