Bllokimi i provimit të jurisprudencës në shqip, studentët e UEJL-së dhe UNT-së i drejtojnë paralajmërim të prerë ministrit

Përfaqësuesit e trupave studentore të Universitetit të Evropës Juglindore (UEJL) dhe Universitetit Nënë Tereza (UNT) kanë shprehur pakënaqësinë e tyre ndaj institucioneve, për shkak të shpërfilljes së kërkesave të tyre lidhur me mundësinë e dhënies së provimit të jurisprudencës në gjuhën shqipe. Sipas njoftimit zyrtar nga ana e tyre, deri më tani nuk kanë pranuar asnjë ftesë zyrtare për takim nga Ministria e Drejtësisë, me qëllim që të uken dhe të diskutojnë mbi gjetjen e një zgjidhjeje për këtë çështje jetike për ta. Nëpërmjet një reagimi të publikuar në rrjetin social Facebook, studentët kanë dërguar një mesazh të qartë drejtuar kreut të këtij dikasteri: "Të fala, ministër! Nëse nuk na ftoni ju, dimë të vijmë edhe vetë", duke paralajmëruar hapa të mëtejshëm. Vlen të theksohet se ky reagim vjen pas një sërë protestash të organizuara më parë në kryeqytet, ku studentët marshuan me një kërkesë të vetme dhe të panegociueshme: mundësimin e dhënies së provimeve profesionale edhe në gjuhën shqipe.